Aizawl Presbytery Nuhmei Pawl Inkhâwmpui vawi 29-na chu, “Khawvel Danglam Mêka Nu Pawimawna” Thuv. 31:15-16; Sam 46:5 thupuia hmangin tarik 25 – 27 October, 2024 sûng khan Aizawl Kohran Biek Inah tluong taka hmang a nih.
Hi Inkhawmpuia hin Pi Rebecca Khawlneikim, Women Co-Ordinator, ICI chu thuhriltuin a ṭhang a. Zirtawpni zan, Inrinni chawhma, Inrinni zan, Pathienni chawhma, Pathienni chawhnung le Pathienni zana hai thupui hring tak leh hlawk thlak tak tak ngaithlak a nih.
Inkhawmpuia hin Unit panga – Aizawl, RSC-Vengthlang, Zemabawk, Sesawng le Dapchhuah unit-hai a’nthawkin palai riek lût 49 le inlân a tam lem an fekhâwm a nih.
Inrinni chawhnung dar 1:00 pm-ah Aizawl Kohran Hall-ah Rorel Inkhawm nei a ni a, rorel palai mi 44 fekhâwmin ro an rel a. Zantieng dar 4:00 bâwrah rorel tluong taka zo a nih.
Inrinni chawhma inkhâwmah Independent Kohran Hla Bu No. 384, “A thla hnuoi deihlim” ti hla hmangin lengkhawm inruolsiekna nei a nih a, Zemabawk Unit-in lawmman pakhatna an lâk a nih.
Inkhawmpuia hin Unit tinhaiin hla an rem thei vawng a, Sesawng Group Song le Aizawl Group Song a’nthawkin inpakna hla hring le mawi tak ngaithlak a ni bawk.
Pathienni chawhmaah inkhawmpui inkâra member chatuon ram lo pan tahai sunna hunser Pastor H. Lalhmunsiama, Bieltu Pastor-in a hmang a, Aizawl Kohran Nuhmei Pawlin sunna hla an rem.
Inrinni zantieng le Pathienni zantienga hai Aizawl Kohran Nuhmei Pawl chun inkhawmpui palai po po ta dingin ruoi inhnik tak a buotsaipêk bawk a nih.
Pathienni zanah Pi Lalumpui a’nthawkin Finance Report ngaithlak a nih a. Pi Lalhmunsiem a’nthawkin Secretary report ngaithlak a ni bawk. Pi Lalawitling, Chairperson-in lawnthu hrilna neiin, WCO kuoma lawmthu hrilnain puon a’n bâttir bawk. Kum 2025 Inkhawmpui vawi 30-naah Dapchhuah-a hlim taka inhmukhâwm nâwk dingin Inkhawmpui vawi 29-na chu Rev. Joseph Malsawmzuol, Presbytery Secretary-in malsâwmnain a khâr.
Thlalak hi i suklien nuom chun click rawh.
Report: Fimthangvung, Aizawl Presbytery Correspondent, CKTP Media Ministry
