75th General Assembly Report

March 9, 2025: Independent Kohran inkhawmpui lien a vawi 75-na chu March 5 – 9, 2025 sûng khan Roberts Jubilee Chapel, Sielmatah tluong taka hmang niin, vawizan khan a lo ṭumṭiek tah.

Inkhawmpui sûng hin Assembly Musical Board, Executive Council, KṬP Central Committee le General Assembly rorel hai a um a. Mipui inkhawm Zirtawp zân a inthawk ṭan niin Pathienni pumhluma inkhawmin, a zanah a ṭumṭiek a nih.

Pathienni chawhnung khan Pastor Ordination le Pension service hmang a ni a. Pastor ordination chang thar hai chu – Mr. Lalhlunsung (Assam Mission Field), Mr. Chawngtuolur Changsan (North Bengal & Bhutan Mission Field), Mr. Fridaystar Timung (Assam Mission Field) le Mr. Dilip Desisow (Arunachal Pradesh Mission Field) hai an nih. Native Pastor ordination chang hai chu – Mr. David Jamatia, Mr. Manuranjan Debbarma le Mr. Sunil Debbarma hai an nih.

General Assembly vawi 75-naa hin kohran thawktu mi pasari Pension pek an ni a. Chuong hai chu – Rev. Zathangsing Zate, Rev. Lalramlawm Inbuon, Rev. HB Laltlansung, Pastor Lalhmaṭhuoi, Mr. Lalṭansang, Ms. Lalmanthang le Rev. Lalhmingthang (Medical Pension) hai an nih.

74^th General Assembly-in Secretary dinga a thlang tling Rev. Lalhmingthang, taksa bawrsâwmna leia Medical Pension pêk a ni le inzawmin Assembly palai haiin Secretary thar dingin Evangelist At Large ni lai zing le CKṬP Chairman Rev. Lalrohlu chu an thlang tling a. Chu baka chun, Vice Moderator thar dingin Upa. Dr. HL Liensang chu palai haiin an thlang bawk a nih.

General Assembly rorel palai mi 257 an ṭhang a, ṭhang remchang lo thupha chawi mi 11 umin, thupha chawi ve loa ṭhang lo mi 10 an um a. Palai hi an rengin mi 278 an nih.

Inrinni tûk khan Gospel Centenary Guest House Compound, Sielmatah General Assembly vawi 75-na le inzawmin Platinum Jubilee lung inngira um chu Moderator Rev. Dr. JL Songate-in a hawng.

Pathienni zan inkhawmnaah Moderator chel lai zing Rev. Dr. JL Songate-in Vice Moderator Rev. HB Hluothang a kuomah Moderator mawphurna a’n hlan a nih.

Tuta ṭuma inkhawmpui lien hi inchik tlak vawng a ni lai zinga pawimaw zuolna pakhatṭhang sa chu Rev. Thangngur a lekhabu ziek Damlai Tuipui Chungah tlângzar nghal a ni hi a nih. Lekhabu hi Christian Literature & Publication Committee-in an sut niin Rev. Lalneikhup Hmar, Executive Secretary, ICI in a tlangzar a nih.

General Assembly mipui inkhâwm hmang a ni sûng hin ICI Central Choir, NPT Central Choir le Unit KṬP Choir haia inthawk hla ropui tak tak el ngaithlak a ni bawk.

Inkhawmpui sung hin Pherzawl kohran haiin Independent Kohran Centenary biekin bawlna ding le inzawmin thingpui hotel le hmeruo bazar (Pathienni ṭhang lo) an thaw a. Pathienni chawhnung inkhawm ṭinin Platinum Jubilee ruoiṭhe a ni a, mihriem 1,000 bawr velin Jubilee ruoi hi an kil niin buotsaitu haia inthawk thu ei hriet.

75th General Assembly Media & Documentation

Video Documentation a hnuoia ang hin thaw a nih.

SUNDAY NIGHT WORSHIP SERVICE

Link to All Videos: Click Here

Live Stream:
– Sunday Night Worship Service
– Pension & Ordination Service
– Sunday Morning Worship Service
– Saturday Night Worship Service
– Friday Night Worship Service

Programme Highlights & Vlogs:
– Sunday Worship Highlights
– Sunday Vlog & Interviews
– Unveiling of Jubilee Stone
– Saturday Night Worship Highlights
– Friday Night Worship Highlights

PHOTOS:
(To be updated)