Setan

Aw sikhawvar, zingkar naupa, iengtiziea vana inthawka tla am i ni ta leh? Hnam tin sukthlutu, iengtiziea hnuoia satthlaka um am i ni ta leh?

Isai 14:12

A UMZIE

Setan chu ‘hektu’ amani ‘intumtu’ (accuser) a nih. Bible ei ena inthawkin hming dang danga hriet a nih – diebol, Beelzebub, rulpui tar, dragon, khawvel lal, boruoka thuneina lal, Lucifer.

A tawi zawngin: Setan chu Pathien thilsiem, Pathien laka hel, rul hmanga Eden huona Pathien thupek zawm lo dinga Evi thlemtu, mihriemhai Pathiena inthawka ṭhuoihmangtu chu a nih.

Bible-ah Pathien kal zawngin mihriemhai lai sin a thaw ei hmu a (1 Chronicles 21:1); Job khawm Pathien lakah a hek a, Isu Krista meu khawm hnuoia a hung lai khan a lo thlem a ni kha. 2 Thess. 2:7 a chun ‘dan hmusitna thuruk’ tiin ko a nih. Thupuongsuo a khawm dragon tia ko a nih.

Thupuongsuo a bawk chun Setan chun Isu hnungzuituhai le Pathien thupek zawmtuhai chu do a ta, a tawpah Setan chu hremhmunah pei a la ni ding thu ei hmu a nih (Thupuongsuo 20:10).

A umzie chu Setan chu a phutin hrat angin inlang sienkhawm hnena ruok chu Pathien ta a nih.

AN TANNA LE TLUKNA

Ezekiel 28:15 ah “Siema i um ni” a ti le “Kan umtir chea” (v. 14) a tia inthawkin Pathien thilsiem a nih ti ei hmu thei a. Amiruokchu Isai 14:1-19 ei tiema inthawkin a dit dana khawsak a tum leiin peithlakin a um ei hmu bawk a nih.

Isai 14:12 a “Sikhawvar, zingtieng naupa” a ti hi Hebrai Bible ṭawng Latina inlet a chun ‘Lucifer’ ti a nih. Lucifer ti chu ‘light bearer’ (lucius ferre) tina a nih. Ei hriet thei dan ding chun Venus, zing le zantienga kawla arasi var tak hrilna a ni deua. Lo en inla, hi arasi hi var hle sienkhawm kawl a chau a uma, vansangah a kai ngai nawh. Nisa a hung suoka hi arasi var hi a bo el hlak.

BIBLEA SETAN INLANGNAHAI

Thuthlunghluiah

1. Evi le Adam a thlem (Genesis 3)
2. Joba chu Pathien lakah a hek. (Job 1)
3. David chu intiempui an thaw tir (2 Samuel 24 le 1 Chronicles 21:1). Intiempui thaw dingin David a thlema. Hi hi Pathienin Exodus 30:11-16 a a khap a nih.
4. Zekaria 3 ah Pathien umnaah Setan le Pathien vantirko chanchin ei hmu.
5. Isai 14 a khawm Setan tlakna ei hmu a.
6. Ezekiel 28 a khawm Setan tlukna san le siem a ni thu ei hmu bawk.

Thuthlung Tharah

Thuthlung Thar a hin Setan hi hming dang dang ko le hril a nih. Chuonghai chu:

Diebol – (ho diabolos) Hektu le intumtu Setan hi Thuthlung Tharah vel 32 a um.

Setan – (ho satanas) Luka 10:8 a chun “Kawlinlep anga Setan hnuoia a tla” thu ei hmu. Hienga hrilna chu Matt. 4:10; 12:26, Marka 4:15, Luka 22:31, Thilthawhai 26:18; 1 Kor. 5:5, 2 Kor. 11:14, 1 Thes. 2:18, 1 Tim. 5:5, Thup. 3:9; 20:2.

Beelzebub – Matt. 10:25, 12:14 ahai Setan le Beelzebub inzawmna a hril a. Beelzebub (Lord of Flies) hi Semitic pathien Baal, Setan hrilna tho a nih.

Misuol – (The Wicked One) Buchi the tekhithu a khan misuol a hung thu a hril khan misuol chu Setan a nih ti ei hmu. Setan chu amaa suol reng a nih.

Khawvel lal – (Rex Mundi) Johan 12:31; 14:30 ah Setan chu khawvel lal angin a hril.

Thlemtu – Matt. 4:3 a chun Setan chungchang thu hrilin “Thlemtu chu a hung” a tih.

Belial/Beliar – 2 Kor. 6:15 a chun “Beliar le Krista khawmin ieng am inngeina an nei a?” tiin a hril. Thuthlunghlui a khawm mi helhmanghai le ringnawtuhai chu Belial nauhai tia a changa ko hlak an nih.

Khawvel pathien – 2 Kor. 4:4 a chun Setan chu khawvel pathien angin a hril.

Boruoka thuneina lal – Ephesi 2:2 a chun Setan chu “Boruoka thuneina lal” tuta awinaw nauhai chunga sinthaw zingtu tiin a hril.

In khingpui – Diebol chu 1 Peter 5:8 a chun “In khingpui” a ti a nih. Setan chu ringtuhai le Pathien hmelma le khingpui a nih.

Dragon – Thupuongsuo a chun Setan chu Dragon angin a hril (Thup. 20:2)

Rulpui tar – Thupuongsuo a bawk hin Setan chu Rulpui Tar angin a hril (Thup. 20:2)

Gospel (Matthai, Marka, Luka le Johan)

Thuthlunghlui a nekin Thuthlung Tharah Setan chu ziek ngun a nih. Isu thlema a um khawm kha Matthai, Marka le Luka ah a chuong vawng a nih. Isu thlema a um kha Baptisma a chang zo hlim a nih a. Isu meu a thlema inthawk khan eini khawm inchuk ding hienghai hi ei nei a nih:

• Baptisma a chang zo, thlaraua a sip lai tak Setanin a thlem. Eini khawm ei hlim lai tak a mi thlem ve thei a nih.
• Ni 40 le zan 40 bu ngheia a phingṭam lai taka a thlem a nia. Eini khawm harsatna ei tuok lai tak a mi thlem thei.
• Setanin nasatakin a thlema, anachu suolah a tlu nawh. Eini khawm Setanin ieng angin mi thlem sienkhawm tlu naw thei ei nih.
• Isu’n Bible thu hmangin a hne. Eini khawm thlemna ei hnena ding chun Bible thu hi ei hriet ve a ngai a nih.

 Chun pakhat dang chu Setan khan Bible thu bawk hmangin Isu kha a thlema. Bible thu, indik lo takin eini khawm a mi ṭhuoi kawi thei a nih ti hriet a ṭha.

Thilhawhai le Lekhathawnhaiah

Juda 1:9 a chun Mikael, vantirko chunghnung tak le Setanin Mosie ruong chunga an insel ei hmu a nih.

Thupuongsuo

Setan chu indonaah hnein a la um ding thu ei hmu a. Chatuon hremhmunah pei a la ni ding thu ei hmu bawk.

SETAN SINHAI

1. A fak thei ding zawnga invak (1 Peter 5:8)
2. Butehlem le inchuktirna indiknaw the (Matt. 13:25,30)
3. Mihriem lungril sukinthim (2 Kor. 4:4)
4. Unauhai hektu (Thup. 12:10)
5. Ringtuhai bu rel anga rel (Sawisak) (Lk. 22:31)
6. Tisa (hringna) sukbohmang (1 Kor. 5:5)

HMATIENG PEIA UM DAN DING

Ei hril ta ang khan Setan chu thilthawthei taka um angin inlang sienkhawm vansamah pei la ning a tih. Hnena chu Pathien ta a nih. Tuhin hrat le ṭiumah lo inlang sienkhawm hnein um vat tang a tih.

Tuhin ṭiumah inlang sienkhawm ei hriet ding chu: a thuneina hi tawpchin nei a nih (limited). Job chungchang a khawm khan Pathienin a hringna hla la a ti lei khan a hringna chungah thu a nei dal a ni kha.

Eini khawm Setan thlema ei m chang tam hleng a tih. Iengtik lai khawma Setan chun a mi thlema, sakeibaknei phingṭam angin ringtuhai chu a mi vel zinga, harsatna ei tuok lai dam, ei hlim lai dam khawma a mi thlem zing a nih.

Chu chu iengtin am hne thei ei ta?

1 Kor. 10:13 tiem rawh. “Mihriem ituor thei bak hrim hrim thlemna in chungah a tlung ngai nawh. Pathien chu a ringum a nih; ama chun in tuor thei bak chu thlemna in tuor phal naw ni; in tuor theina dingin thlemna ruolin tlan suokna lampui siem nghal a tih.”

Pathien a ringuma, a ti bak a chu Setanin thu a nei thei ngai naw a nih. Ringtuhai chung a khawm a kut a thlak thei bawk nawh.

Ziektu: Rev. Dr. James R. Ruolngul