Tulaia ei ram buoina rapthlak tak el hi mitinin ei in vawi a ei hmazawn senga theitawp suoin thang ei lak seng a, lungril a fang na hle el, naute dangchar in a nu nenetui ngaia a tap angin ei Pathien tap thlawk thlawkin ei ko ani deu tak. Jerusalam siet hun laia Pathien nauhai rinum tuor zie le Pathien an ngai zie kha eini tuok le tekhi ruol ninaw sien khawm lungrila an lang vawng vawng hlak. A nauhai tap in inrum ri kha hrein a hnunga a hung dawnna thu khawm ei hmu thei a, a thlamuong thlak ngei el. Ei tap inrumna hai hi ei Pathien hin mi hung dawn vat ta sien ei nuom hle a nih.
Psalm 79 thu hi ei tiem chun Jerusalem run in a um a, Pathien nauhai chu nasataka sawisakin an um a, an biekin inthieng chu an sukpawrche a, inthatna rapthlak tak el a tlung bawk a, A mi inthienghai sa chu ramsa hai kuoma pekin a um a, an thisen hai chu tui angin a luong a, a phumtu ding hlak tukhawm an um si nawh. An chan hi ngaituo chun a rapthlak hle anih. Juda haiin an thilphut an ngaipawimaw em em pakhat chu misuol, mi hnuoihnung khawm nihai sien an ruong chu inza taka sawngbawl a, phum hi anih. Phumtu ding khawm um loa thata an um el hi chu anta ding chun inhmusitna tawpkhawk anih. Hienga nasa taka tuortheina popo an tuor hnungin an Pathien tieng an ngha a, an tawngtai anih. Hi taka an tawngtaina hi inchuk ding le hrietding ei neive niin an lang anih. An harsatnahai, an tuorna hai le anthiltuok hai popo Pathien kuoma an in tlun hnungin “suol thupha an chawi anih” (79:9). Harsatna nasatak tuok laia suol thupha chawi dinga inphut chu thil inhme lo angin an lang el thei. Hieng lawmin eini khawm ei tuor ve ta a, ei biekbukhai sukpawrche le sukchimin a um ta a, mi tamtak hringna chan an um ve ta bawk a, mani in le lo khawm hluo ngam loin ei rausan zo tah, hieng bak bak harsatna chu iem ni tang ata? Harsatna lien lem khawm a um thei ta dim anih? Ei Pathien kuom tieng ei ngha a, ei tawngtai lai hin suol thupha chawi hi ei thaw makmaw ding anih. Ei suol leia ei tuor chu ei ti phal/ ngam nawh. Thil nithei tak khawm anih. Nisienkhawm thawveng taka ei um lai khan Pathien laka ei helna hai le Pathien ei inphatsan na kha tamtak um ngei atih. Judahai khawm tha em ema an in ngai lai khawm Pathien laka suksuol tamtak an lo nei anih.
An thlatuhai suolna chen khawm thupha an chawi anih. Ei suolhai thupha chawiin Pathien kuoma hang ngha phawt el ei tiu. Chu zoa an tawngtaina hla nawk chu “kumkhawtluongin lawmthu hril kan ti che a, suon popo chenin nangma inpakna chu inhriettir pei kan tih” (79:13) tihi anih. Judahai hin iengleia Pathien kuoma thangpui dingin an ngen a, anhmelma hai laka an him theina dinga an tawngtai am ana? A biekbuk inthienga Pathien inpak nawk an nuom leia an ngen anih. Eini khawm nasa takin Pathien kuoma ei tawngtaia, hmelma hai laka misanhim dingin ei ngen anih. Amiruokchu iengleia ei ngen am ana? Ami dawn hnung hin ei nundan pangngaia eila nun nawk el chun thil pawilem hungtlung pal ata? Eilo nundan anga nun ta lo a, ahma neka thalem nundan ei nei nawk na ding dam, a hma neka thalem a ei inpaktheina ding dam in ngen inla chu ami thangpuitu ding khawm inhawk lem ngei atih. Ei kohran, ei hnam, insung tin le mimal tinin Pathien laka suol thupha chawia ei nundan hlak anga nun talo a, nundan thalem, nundan mawi lem le Pathien ei inpak nawk ngei theina dingin hei tawngtai thar nawk ei tiu ie.
Hieng anga an tawngtai hnung chun Pathienin a nauhai tap rawl chu an ringnaw tieng deiin a hung dawn a nih. Persia Lal Kura rawiin Babylon sipai hrathai tukdawlin an um a, Juda hai chu an temple bawl tha nawk dingin a tir kir tawl anih. (Ezra 1). Pathienin anauhai tawngtaina chu ei ring neka thalem hmanin ami dawn hlak anih. Ei Pathien hi ringzo nawk zuol ei ta, iengtik ni am ani chu ei tawngtaina hai hi ei beisei neka tha lemin ami la dawn ngei ding anih. Ei Lalpa Pathien hi ringzo phawt phawt ei tiu. Ei hmelma hai hi ieng anga lienin hrathai sienkhawm ei Pathien hin thil a thawthei lema, a hratlem bawk a, Ama chun a nauhai, a ringtuhai chu a thangpui lem ngei ngei hlak anih. Chuleiin Jerusalem nauhai inrumri kha Lalpa’n a hriet a, Zohnathlakhai inrumri hi Lalpa’n nghatsan bik naw nih.
Emmanuel Lalzarlien
Hamren
