Independent Church of India, Assam Mission Field Department tin Business Conference chu Chirilangso khuo-ah tarik 25 – 27 October 2024 hun sûng khan nei a ni a. Rorêlna hi Zirtawpni zân a ṭan in, Inrinni zân chen nei a ni a. Department tum tum hieng: Naupang, Ṭhalai, Nuhmei, Musical, NPT le Field rorelna hai nei a nih. Department tin a’nthawk palai mi 80 vel fe khâwmin rorelnahai tluongtaka zo a lo ni tah.
Pathienni zîngkar hin Ordination Service hmang a ni a. Chirilangso Kohran upa dinga thlang thara um Pu Monsing Teron chungah Rev. Lalramnghet Ṭhiek, Field Secretary-in rawngbawlna a nei a. Zân hun inkhawmnaah Pastor Lalziding-in Pathien thucha hrilna a nei bawk.
Thu bel: Presbytery le Field ṭhenkhat angin Department binga inkhawmpui le rorelna hai hi thaw a la harsa deu leiin, Department tin hin ṭumkhat rorelna October thla sung hin nei a ni hlak a. Thu le hla le inruolsiekna dang dang hai chu a kumthar February/March thla haia nei a ni tlangpui hlak a nih.
Report: Sema Faihriem, Assam Mission Field Correspondent, CKṬP Media Ministry
