Independependent Church of India, Shillong Madanriting Kohran Local Mission Committee chun Nov. 2 – 3, 2024 hun sûng khan Assam Mission Field-a Hamren Kohran, West Karbi Anglong kanna an nei.
Madanriting ICI Kohran, Local Mission Committee hai hi mi 13 zet hung inthawkin, Kohran kan naran el ni loin Free Medical Camp phuisui takin an nei a. Medical Camp hi a bîktakin Upa Dr. Challiensung le a nuhmei Pi Esther Lalhmangai (Staff Nurse, NEIHGRIHMS) hai inrawina hnuoia nei a ni a. Damnaw, natna chi dang dang nei mi 100 chuong zet el an en a. Damdawi chi dang dang a thlâwnin an sem suok bawk. Chun, Kohran haiin thilpek an thawkhâwm thuomhnaw (secondhand) pick-up truck pakhat sip zet an hung chawi a; Assam Mission Field sûnga Kohran hai laia sem dar dingin Rev. Lalramnghet Ṭhiek, Field Secretary kuta inhlânna an nei.
Hamren, Assam Mission Field-a an cham sûng hin Seminar ṭum hni lai nei a ni a. ‘GYNECOLOGICAL PROBLEMS AND CHRISTIAN COUPLE RESPONSIBILLITIES‘ le ‘CHRISTIAN FAMILY & CHALLENGES‘ ti thupui hai hmangin Upa Dr. Challiensûngin hnesaw takin hun a hmang a. Mipui inkhawm huna Pastor H.D Ramtharlawm-in Pathien thua rawngbawlna ṭum hni a nei bawk.
Inkhawm huna hai hin Nk. Quilyn Lalrovel, Tv. Lalhmangaizuol le Pi Valentina Varte haiin hla tienga rawngbawlna an nei a. Pathienni zântieng Shillong Madanriting Kohran le Assam Mission Field ṭhangruolin ‘Hmangangaina Ruoi’ ṭhe a ni bawk.
Shillong Madanriting Kohran hai inpekna a ropui tak zet a. Missionary hai ta dinga phûrna thar petu khawm an ni bawk a nih. Thu le hla el chau ni lo, taksa damna dinga pawimaw em em damdawi tamtak le sil le bil ṭhatak tak hai ringthar hai ta dingin phal takin an mi maksan pek a. Pathien ram lien pei na dinga an inpekna hai a ropui tak zet. An inpekna le an luongsuokna nun hi a ropuiin entawn thlak tak an nih. Ei Pathienin malsawmna tamtakin vur mawl raw seh.
Report: Sema Faihriem, Assam Mission Field Correspondent, CKṬP Media Ministry
