Aizawl Presbytery 29th Presbytery Conference chu Thlaphal 8 – 10, 2024 sûng khan “Inpumpekna” ti thupui hmangin Dapsuo Kohrana nei a nih.
Zirtawpni zan a’nthawk program hmang ṭan a ni a. Upa R. Vanlalawi, Presbytery Chairman-in lawmlutna a nei a. Rev. Joseph Malsawmzuol, PS-in ‘Kohran Inṭhuoi Dân’ ti thupui hmangin seminar nei a nih.
Inrinni-in Upa R. Vanlalawi keiṭhuoina hnuoiah ro 18 zet tluong taka rel zo a ni a. Rorel zoin palai hai le Presbytery Choir hai fâk dingin inkhâwmpui tlungtu kohranin fak a buotsai a, kîltuhai an khawpin, an tlai hle. Aizawl Presbytery sûnga Inkhawmpuina phawtah hieng hi insukhmu pei a ni a. Palai fekhawm hai ta dingin a varzângin, lâwm a um thei tak zet.
‘Inpumpekna’ thupui hmangin Rev. Joseph Malsawmzuol, PS, Pastor H. Lalhmunsiama, Awptu Pastor le Pro. Pastor Rohluosang hai a’nthawk ṭha tak tak ngaithlak a nih.
Pathienni chawhhnung inkhawm hunah Upa namdet rawngbawlna nei a ni a. Upa Vanlalzawn, Presbytery Vice Chairman-in keiṭhuoiin, Presbytery Secretary-in inhmelhriettirna a nei a. Pastor H. Lalhmunsiama-in namdet rawngbawlna a nei.
Namdet hai hi Upa Lalremlien, Sesawng le Upa Lalbieklien, RSC-Vengthlang hai an nih.
Chun Upa Lalthenlo, Senvon a’nthawka hung inpêm chu Aizawl Kohran Upa dinga confirm a ni a. Upa Dovel khawm Talan a’nthawka hung inpêmin, Sesawng Kohran Upa dinga confirm a ni bawk.
Inkhawmpui hun sung hin Presbytery Choir hai a’nthawk inpakna hla hring tak tak el ngaithlak a ni a. Tuta ṭum inkhawmpui chu rorel palai ni lo mipui fekhawm tam ṭum tak a la nih.
Pathienni zanah Upa Vanlalzawn, Presbytery Vice Chairman-in lawmthu hrilna hun hmangin, inkhawmpui vawi 29-na chu khâr a nih.
Dapsuo hi NH-44A in a paltlang a. Mamit District sûnga um niin, Aizawl a’nthawk Km 63 a hla a nih. 2011 census dungzuiin mi 1089 chêngin, in 255 a insâl an nih. Tut vadung kama um a ni a, a vadung km 1 huom sung hi chu VC haiin vadung sûnga cheng hai hrim hrim man a khap leiin nga khawm an ngampa hle.
Eini ICI kohran khawm kum 1986 a indin lo ni tain, tuhin Pro. Pastor Rohluosang a um mêk.
Report: Fimthangvung, Aizawl Presbytery Correspondent
