“Ama hlak chu a la muong hle si a”

Gen. 19:16

Sodom mihai suolna kha rapthlaktak a nih. LALPA vantirkohai Lota ina an chu tlung khawm khan, a khuoa mihai, a lien a chinin an hunga, anni chu “inpawlpui” an lo tum el a nih. A va rapthlak lawm lawm ngei de. Hienga an suolna leia “LALPA hmaa an khekri chu a lo nasa ta hle leiin hi khuo hi kan sukbohmang ding a nih” (Gen. 19:13) an ti el. Abraham ngenna angin Lota le a sunghai chu an him theina dingin Sodom khuo suoksan dingin an hril a, “an tur ta a” (Gen. 19:15). A tur a tur el a ngai an tah.

Chu lai chun, “Ama hlak chu a la muong hle si a” (Gen. 19:16).

A va buoithlak ngei de. A tawpa chu a keiin an keia, khawhnawmah an kei suok hlawl a. Chutaka khawm chun “I hringna dingin tlan suok rawh” (Gen. 19:17) an tih a, tlanga fe dingin hrilhai sienkhawm, “thei naw ningah” a la ti a ni chu! Chu khawm chun, an la phal pek a, Zoar khuoah fe dingin an la hril a. Zoar ah Lota fe lei chun “khuo i hril chu sukbohmang naw el ka tih” (Gen. 19:21) a tih a.

Hilai thu hi ka hang tiemin, mihriem suol zie dam, ei suol leia hremna ei tuok ding zie dam, Lalpa Pathien hmangaina dam, suola inthawka ei suokna dinga Pathien lung inhmaw ding zie dam, chulaia ei muong zie dam le amain tlanna a thaw zo hnung khawma a keia kei suok ei la ṭul zie dam, chu hnunga khawm Lalpa ti dana hring neka, thil po po a awlsam zawng ngawt thaw ei tum zie dam ka ngaituo a. Vawisun hin, hienghai po po hi ei hrilfie ding chun a sei taluo ding a ni leiin, hrilfie chuong nawng ei ta. Ei ngaituo zawm pei dingin sie lem ei tih.

Unau, suolnaa hin i la muong hle maw? Hun a tawi tah. I hringna dingin a tlanin tlan suok ta rawh. Khawvel hi a bohmang ding a na, a bohmang zing an tah.

Rev. Dr. James R. Ruolngul