Kum 2015-a Mizoram Synod inkhâwmpuiin, “Kohran inpumkhatna zawng ni rawh se” tia a lo rêl, bawzui a ni lai zingin, Mizoram Baptist Kohran Assembly 2021 chun “Council of Churches in Mizoram din ni seh”, tiin a lo rêl ve nawk a. Chuong ang Mizorama Kohran lien pahni hai hma hung lâk ṭanna a inthawk chun hi inpumkhatna le thawtlangna lungril chu a hung pieng suok ta a nih.
Kohran pahnihai hmalakna chun Joint Committee a hung ngîr ta a, hi Joint Committee hi vawi nga inṭhung a nih. Chuong Joint Committee inṭhung hai chun kohran dang dang hai khawm fiel ni sien tia an rel bawzuiin, vawisun hin kohran 8 hai chu lunginruol takin inpumkhatna beiseiin official takin Council of churches in Mizoram (CCM) chu tarik 26 – 27, October 2024 khan Mission Veng Biekinah program ropuitak hmanga hawng a nih.
ICI kohran khawm hi inpumkhatna pawl a hin ei ṭhang ve ngei theina dingin Rev. Dr. R. Vanlalnghaka, Synod Moderator chun vel hni lai a mi hung biek a, chu bawzuina chun ei hotu Rev. Lalneikhup Hmar, Executive Secretary (ES) hang râwn a ni a. Ei ES thurawn angin member pakhat ni ve dingin Aizawl Presbytery Office a inthawkin lekha siemin, Joint Committee inṭhung vawi-4 naah member pakhat ni dinga pawm ei nih. Hi thu hi Aizawl Presbytery Standing Committee inṭhung vawi-70 na chun a lo bawzui a, Executive member ding mi pahni ruot dinga ti ei ni angin Rev. Joseph Malsawmzuol le Pastor H. Lalhmunsiama hai chu ruot an nih.
Member ei hung ni ta leiin Joint Committee vawi-5 na Serkawn, Lungleiah ko a ni a, member pali intir a nih. Chuong hai chu, Rev. Joseph Malsawmzuol, Pastor H. Lalhmunsiama, Upa Solomon Sungte, Upa Vanlalzawn hai an nih. Hi Joint Committee-a hin CCM hawngna inkhâwmpui programme hai pawmna nei a nih. Hi Joint Committee-a hang fe hai hung kîr tieng comment dân chun phûr tieng nekin phûr nawna tieng a âwn deuin a’n lang. Chuong laia lungril pakhata um chu hawngna inkhawmpuihai dam la nei ei ta, belchieng deu ei ta, phûrna thar khawm um a tih, tiin lungril kan siem tlang ta a nih.
Hawngna inkhâwmpui tieng hang fe nawk ta in la; ICI kohrana inthawk rorel palai mi 20 le mipui inkhâwma ṭhang ding mi 50 inruot dinga inhriettir ei ni a. Chu dungzui chun Aizawl Presbytery sûnga kohran panga a inthawk palai ding inruotin, CCM hawngna inkhâwmpuiah va ṭhang ve a nih. A hun hi Aizawl Presbytery Nuhmei Pawl Conference vawi 29-na leh a’n tuok char a, sienkhawm insiemrem dan hai ngaituoin, hun pawimaw zuol bîk haia chu ei va ṭhang ve pei thei a nih. Constitution and By-Law hai entlângna nei a ni a, CCM thiltum hai ei bêl chieng a, kan beisei nek khan phurna thar a mi pek ni’n ka hriet a. Rorel palaia ṭhang hai an rêngin indawn kim vawng hman naw lang khawm a tam lem hai hmu dan (an feedback) a ṭha tâwl hlein ka hriet. Hi inkhawmpuia hin ICI Kohran chanchin report tawi minute 5 pek ei ni ve a, kimchang takin pe thei naw in la khawm hun ṭhatakin ka va hmang ve thei a, ka lawm hle.
Hlapawl sak dingin program-a inchuon ei ni ve a. Aizawl Presbytery Choir la naupang tak el ni sien khawm, hi hun va sukbik dinga ngên an ni ang takin thei tâwp tak meu meu insuoin an inbuotsai ve a, Pathienin mak le danglam takin a ṭhuoi a, Pathienni zân hlapawl sak dinga ruot ve tho Synod Choir, EFCI Choir hai nêk khan Aizawl Presbytery Choir hai (Hmar Hla) Pu Diamond M. Tusing-in a phuok “Lalhai Lal” chu thiem takin an sak a nih. Inkhawm ṭîn mipui laia ṭawngbau ṭhenkhat ei hriet dana khawm “an sa ṭha hle mai ICI ho chu”, “an sa nung hle mai” tia comment siem an um nak ni âwm a nih. Lalpa chau ropui raw seh!
CCM Office ding tarik 28 October 2024 Thawṭanni zîng dâr 7:30 AM khan hawngna inkhâwm nei a ni a. Thlaithleng awtna hai neiin, phuisui takin Synod Conference Hall, Sikulpuikawnah program hmang a nih. Hi office hi Mizoram Synod-in an hmun ṭha êm êm el a thlâwn tawpin an mi lo inhmangtir a nih. Mizoram Synod hai hi nu le pa an tlin hle.
Chun, Mission veng Kohranhai inpekna khawm a ropui rum rum hle. CCM inkhawmpui dinga budget an siem po 31 Lakhs (nuoi sawmthum pakhat) a nih. Inkhâwm zâta mipui fekhawm hai fak ding refreshment changkang tak tak an sem zie bawk a, hieng ang huna ṭhang ve phâka ka um hi ropui ka ti a, Pathien kuomah lawmthu ka hril.
CCM ṭhuoitu thar dinga ruothai:
President: Rev. Dr. R. Lalbiakliana, BCM
Vice President: Rev. B. Zazawna Lai
Vice President: Rev. Lalrodingpuia LS Nghaling
General Secretary: Rev. Dr. Lalhmangaiha, MPC
Joint Secretary: Rev. T. Salaw
Trasurer: Upa R. Lalmalsawma
Finance Secretary: Rev. Jessai L. Neitham
Ei hmathlir dinga pawimaw ṭhenkhat: Mizoram state hi ei ni Zohnathlak hai ta ding chun hmun pawimaw tak a hung ni pei ta a, ṭawng thua khawm ni sien, inthlierhranna a um ta naw a, zalen taka ei hnam ṭawng le khawsak dân hai ei puonglang ngamna state a ni pei ta a. CCM hin kohran inpumkhatna tieng chau a tum naw a, hnam inpumkhatna chen khawm a thiltum lien tak lai a ṭhang a nih ti hi hmu theiin a um.
Ei Kohran khawm ṭhang lâkna ding lien tak tak ei hung nei pei ta ding niin a’n lang a. Mizorama hin Presbytery pali ei um mêk a, hieng pali hai sukchangtlungna dinga remruotna ei siem khawm a hung ngai pei ta ding niin a’n lang. Chuleiin, hmathlir sei tak neiin, a um ta hai sukhrat, sukdet le suklien dân ding hi ngun taka ei ngaituo a ngai tah.
– Rev. Joseph Malsawmzuol, Presbytery Secretary, Aizawl Presbytery
