Rom 1:16
Tirko Paula hi lekhathiem, Rom mi, Pharisai, Hebrai kara Hebrai ngat a nih. A nina hi fepui pei sien chu Judahai ṭhuoitu ni ngei ngei a tih. Amiruokchu, Lalpa Isu Krista Chanchin Ṭha a hmu tlat leiin chuoghai po po chu maksanin an vakvaipui a. Hmun tin ram tina kohran a phun leiin Chanchin Ṭha hi an dar pei a, ama khawm harsa em emin a hringnun a hmang. A changin vuok a tuor a, a changin intangna ina khum a ni bawk a, theidain a um a, hnawlin a um hlak. A thi dan chen khawm ei hriet seng.
Ieng leia hieng po po hi a tuor el am a na? A izui Pathien a hriet chieng em a, a thilthawtheina a hriet chieng ema, Chanchin Ṭha thilthawtheina a chieng em em lei a nih.
Vawisuna Kristienhai hin Chanchin Ṭha hi ieng ang charin am ei ngai ve a? Bazara hotela bufak tawm ṭawngṭai ringawta khawm tamtak chun ei inzapui deu an naw maw? Paula chu thi chenin an zapui nawh. Ramtinah a fe a, a hril pei lem a nih.
Ei Sandamtu Pathien hi belchieng ei tiu a, a thilthawtheina a pangngai zing a nih. Ei hriet chieng naw leiin ei ringhla mei mei lem a nih. Ei la chier a ni chun, ei la hriet chieng naw lei a ni hlak.
“Tukhawm a awihai po ta dinga sandamna dinga Pathien thilthawtheina a ni si a” (Rom 1:16).
Rev. Dr. James R. Ruolngul
