November 11–13 sûng khan Independent Kohran Tuiṭhaphai Presbytery chun Conference vawi 75-na le Platinum Jubilee lâwmna, ‘Pathien Ṭhuoina Mak’ ti thupuia hmangin, Saikot Sub-Hqrs. Biekin compound-a hall lien tak bâwlin, ropui takin an hmang.
Platinum Jubilee lâwmnain Jubilee dâr vuokna nei a ni a, Jubilee hrietzingna lungmâwi Tuithaphai Presbytery Chairman Upa Dr. H.L Liensang in a hawng. Jubilee hrietzingna dinga Souvenir lekhabu buotsaia um chu Rev. Zathangsing Zate, Secretary, Finance & Development in tlângzârna a nei bawk.
Jubilee lâwmna hi ICI General Headquarters, Presbyterian Church of India (PCI), Evangelical Free Church of India (EFCI), Reformed Presbyterian Church North East India (RPCNEI), Evangelical Assembly Church (EAC) le Assemblies of God (AG) a’nthawka ṭhuoitu haiin hung uopin, Jubilee chibai bûkna neiin, lawmpuina thilpêkhai an pêk.
Kum 75 sûnga Tuiṭhaphai Presbytery ṭhuoitu lo ni tahai le rawngbâwltu Pastor lo um tahai po po kuomah châwimâwina thuziek le hrietzingna Memento pêk suok a ni a, November 13, Pathienni sûn inkhâwm hunah Kohran Upa ni dingin mi 3 hai kuoma Ordination pêk a nih.
Inkhâwmpui hun sûng hin Rev. Lalneikhup Hmar, Secretary, Ministries & Education, Rev. Lalramlawm Inbuon, Evangelist at-large (EAL), Rev. Lalrohlu, EAL le Upa Dr. H.L Liensang, Chairman, Tuiṭhaphai Presbytery haiin Pathien thucha hrilna an nei a, ICI Central Choir, NPT Central Choir, Tuiṭhaphai Presbytery KṬP, Saidan KṬP, Khawmawi KṬP, Hmarveng KṬP, Sielmat KṬP, Lamka KṬP, Rengkai KṬP, Gilgal KṬP, Muolvaiphei KṬP, Hebron KṬP, Saikot North le Peniel KṬP, Saikot Sub-Hqrs. KṬP, Ngurte KṬP, Bethesda College of Nursing Choir le Home Mission hai a’nthawk inpâkna hla mawi tak tak ngaithlâk a nih.
Presbytery Secretary Rev. Lalneikhum Sungte in Presbytery report a pêkna a chun kum 2022 sûng (October chenah), Pathien hmangaina leia kohranhai a’nthawk thawlâwm General Fund hieng Sawmapakhat – Rs. 3,11,60,125, Faiṭham – Rs. 11,58,346 le Rahmasa – Rs. 1,82,160 dawng a ni a, September Beiruol thaphût – Rs. 7,96,428 le Mission Fund hieng Faith Promise – Rs. 25,13,070, Individual Support – Rs. 41,82,736, Group Support – Rs. 8,51,580 le Thlathar Thawlawm – Rs. 3,52,460 General Headquarters a submit a ni thu a hril.
Report a pêkna pei a chun, kum 2022 sûng Tuiṭhaphai Presbytery-a a vawikhatna dingin Home Mission, unau Meitei hai lâi ṭan a ni a, Hindi ṭawng hmanghai lâi rawngbawlna nei vat beisei a ni thu a hril. Chun, biekin thar Saikot-ah Peniel Biekin bâwl zo a ni ta a, Moreh Pastor Quarters le Biekin bâwl mêka um khawm tukum December-a bâwl zo hman dinga riruong a ni a, Sombaru Memorial Chapel, Odisha khawm bâwl zo mêk a ni thu report a’nthawk ngaithlâk a nih.
Presbytery Secretary in statistics report a pêknaa chun Tuiṭhaphai Presbytery-ah unit 25, in (house) 1762, member 9000 chuong, Pastor 6 le Pro. Pastor 3 rawngbâwltu an um ta thu a hril sa bawk.
Inkhawmpui hun a hin Tonic Solfa Junior exam-a hlawtlingna chang mi 4 le Elementary mi 2 hai kuomah certificate pêk suok a ni a, Ngurte KṬP in Kristien Hlabu no. 1 – 270 le Independent Hlabu no. 1 – 60 an saksuok thei leiin Presbytery Musical Board in thuziekmâwi le sumfai Rs. 10,000 a pêk bawk.
Inkhâwmpui hun sûng po po hin mipui ruoi ṭhe a ni a; Rev. Dr. JL Songate, Principal, Sielmat Bible Collece in conference khârna a nei.
