Kanaan phaizâwl Saron pâr mawi,
Tiena Romhaiin an lo sukthliek;
Bis: Tlângkhuo a ngui ie, saron an thliekna chu,
Nunau an inrieng, hliekhutu nei lovin;
An damna Saron pâr an thliek leiin.
Saron pâr mawi an thliek hnung kha,
Ama lungkhamtuhai kuoma chun;
Bis: Lili’n a hung pâr an lungril inthimah,
An lu chung zâwnah zing-arsi’n a hung var,
An sirah lâwmna rimtui ân zâm vêl.
Saron pâr i la mawi zo nawh,
Hmar tlângpui inthim sûnga hin chu;
Bis: Sûmpui a la zîng i pâr mawi hlie dingin,
Nisa’n hung var la, i hmêl hung inlang sien,
Achun i mawi zie lo hre tâng an tih.
Kanaan phaizâwl Saron pâr mawi,
Judai ramah hung tuoi thar nâwk rawh;
Bis:Zalên an nuom tah thilsiem tinrênghaiin,
Ngaiin an thlir che ânrieng hnuoi mihaiin,
Israel khawmin lâwm tâng an ti che.
Aw Saron pâr, hmu ka nuom che,
Vân ropuia i hung pâr ding chu;
Bis:Inremna thinga i tliekna hmuna chun,
Hung inthuom i ta, zalênna ropuiin,
Sa le mihriem dorâl bâng tâng an tih.
Phuoktu: Rev. Thangngur