Is. 49:14-16
Ei hringnuna hin beidawngna le harsatna a tam ngei ie maw? A belsatu dingin natna hripui hung inlengin, sung tin, khawtlang, kohran le a ram ei buoi el tah. Tamtak chun an sinthawnahai chawlsanin, maksanin hriet naw ram pan mek angin ei um a. Sung le kuohai le mani in meua khawm inlawi lut el thei loin an um bawk. Sum le pai harsatna a tlung, hmangaina a tlawm deu deua, hringnun a ‘fair’ naw tina ramin an chang el tah.
“LALPA khawmin a mi maksanin a mi theinghil tah, hrietfukin ei um ta nawh. Ram rausan rama um ei ni tah” ei ti am? Ti a awl. Ti a awm.
Pathien mihai khawm an bei a dawngin, “Jehova chun a mi maksan a, Lalpain a mi theinghil tah” (Is. 49:14) an ti ve a nih. Anni khawm an ram chu mi rilohaiin an hung do a, an buoi a nih. An hrietthiem thei bik nawh.
Amiruokchu, LALPA Pathien chun a theinghil der nawh. A lunginsietin a hmangaia, a en ngawi ngawi lem a nih ti an hriet naw lei chauh a nih. LALPA chu a hung tawng tah a, “Nuhmeiin a naupa, a rila ra chu, lunginsiet nawna dingin a nau nene ne lai chu a theinghil thei am a nih?” (Is. 49:15) a ti el a nih. Nau nei tahai chun hrethiem hleng an tih. Ieng leiin am nu chun a nau, nene ne lai chu theinghil el a ta? Mihriem misuol hmanin chuonga ei theinghil naw ding a ni chun LALPA Pathien chun a mi hrietfuk nasa awm de maw?
Annawleh, ei suol em leiin ei lo theinghil khawm nisien, LALPA chun a mi theinghil chuong nawh. “Chuonghai chun an theinghil thei a ni thei a, nisienlakhawm, kei chun theinghil naw ning che” (Is. 49:15), LALPAIN a tih. A va ropui de!
Chu khela chun, “En ta, ka kutphahaia hin ka ziek che hi” (Is. 49:16) a la ti deu deu a nih.
I harsat lai tak khawmin, LALPA Pathien kutphaa ziek i nia, a hriet zing che a nih. I bei a dawng maw? Pathien kutphaa ziek i ni kha. “Kei chun theinghil naw ning che” titu hi hnuoi le van Siemtu Pathien a nih. Pathien chun eini khawm a mi hmangaia, a mi en ngawi ngawia, ei lo buoi hi a hmangaina ei lo hriet naw lei mei mei a ni hlak a nih.
-Rev. Dr. James R. Ruolngul
