General Assembly neina ding hmun sawn a nih:
74th General Assembly chu Saidan, Tuithaphai Presbytery a nei ding tia rel nisienkhawm Manipur buoina leiin remchang dinga an lang ta naw leiin Virtual Executive Council chun a hun pangngaia Sakawrdai, Hmarphei Presbytery a nei lem dingin a rel. Kohran harsatna hrethiemin Sakawrdai kohran khawmin inhawng tak le lawm taka inkhawmpui lien tlung dingin an lo rem ti a, lawmum ei ti tak zet. Sakawrdai kohran chun biekin sir velhai chei thain, a ceilinghai thleng danglamin nasatakin an lo inbuotsai mek. Pathien zara tha taka inkhawmpui ei nei ngei theine dingin tawngtai ei tiu.
Standard English School, Hichachara:
Standard English School, Hichachara, Tripura Mission Field hi South Tripura District a hnam hnufuol Tripura hnamhai ngaituona leia Pathien ringsana April 29, 2008 ah indin a nih. Evan. Lalthuoikim in naupang 50 le chau hi school hi a lo tan a. Pathienin a mihai tawngtaina le missionaryhai inpekna mal a sawm a, hma a sawn hrat hle. Tuhin, pawl riet chen inchuk student 377 lai neiin zirtirtu 19 in an enkawl mek a nih. Hostel ah naupang 58 (pasal 37 le nuhmei 21) enkawl an ni bawk. Headmaster khawm inthlak peiin Evan. Ngamsangluoi, Evan. Ramhawngthar le Evan. L. Achung Kom haiin hi school an enkawl pei a nih. Kohran ta dinga thaw hlawk tak project a nih.
2020 ah Covid hripui inleng leia kohranin harsatna a tuok khan missionary hlaw dingin cheng nuoi riet a thaw a, tukum khawm Manipur buoina leia kohran an thawt deu leiin cheng nuoi sawm panga zet a thaw nawk baka Tripura Field ah biekin bawlnaah cheng nuoi sawm pahni zet a thaw ta bawk. Kohranah a hung thawlawm po hi cheng nuoi sawm thum panga zet a tling phak tah. Tuta tuma ei magazine sut man khawm hi a tum a nih. Kohran harsatna phuhruk thei ding hieng school a mi pek leiin ei Pathien hming ropui tak raw se. Sawrkar ramah school siem a ni leiin ram lekha nei thei an naw a, tuhin, mimal ram inchawk dinga buoipui mek a nih. Sawrkar recognition khawm la nei lo zing a ni leiin sawrkar recognition a nei vat theina dingin tawngtainan hre seng ei tiu. Evan. L. Achung Kom, Headmaster le a staff hai tawngtainan san zing hlak ei tiu.
Sielmat Bible College hawng nawk a nih:
Buoina leia a hun taka hawng thei lo Sielmat Bible College chu August 19, 2023 khan hawng nawk a ni tah. Manipur buoina leiin student hung nuom tam tak an hung thei naw a, Arunachal Pradesh le Assam Mission Field a inthawkin mi thar pakhat ve vein an hung zawm thar.
Staff quarters hawng a nih:
Sielmat Bible College ta dinga staff quarters bawl chu a sawng khatna hluo thei dinga zo a ni tak leiin August 14, 2023 khan Rev. Lalneikhup Hmar, Secretary, Education Department in Pathien kuomah inhlanna neiin a hawng. Hi quarters thar hi Rev. Joe Sanghmingthang le Pu. James Lawrence Darngawn haiin an hluo nghal. Hi quarters hi Associating Evangelical Movement of Wales haiin cheng nuoi sawm hni le sing nga an hung pek hmanga bawl a ni a. Sawng khat dinga ti nisienkhawm Pu. Siam Simte in a JCB a thlawnin a min hmang tir a, a hnuoi siem remin sawng hnia bawl lem a ni tah. A bawl dan thlak danglam a ni leiin sumin a dai ta naw a, laklaw taka chawl san a nih. Amiruokchu, quarters a umnaw chun SBC tiengin harsatna an tuok ding baka sum hung petu laka inthlahrung a um leiin Secretariat in thei ang angin a sunzawm pui a nih. A sawng hnina hi inkhawmna dinga buotsai mek a ni a, a sawng hnuoi ruok chu quarters pahni dinga bawl a nih. Amiruokchu, sum indainaw leiin a sawng hnuoi hi pindan la siem loa hluo a ni a, Manipur buoina leia raltlanhai Sielmat Bible College hostel ah umhai sawn suokin hi taka hin in um tir hri an nih.
Tieulien ah Pastor quarters hawng a nih:
Manipur buoina leiin biel po poah development sin hrim hrim suk chawl nisienkhawm kohranin a mamaw em em =ieulien ah Pastor quarters bawlna dinga Muolvaiphei Rural Health and Research Centre in cheng nuoi nga a pek hmanga =ieulienah Pastor quarters bawl chu Pathien zara hawng thei dinga tha taka bawl zo a ni tak leiin Rev. Lalremthang Hmar, Presbytery Secretary in August 9, 2023 khan Pathien kuomah inhlanna a nei. Pastor Ebenezar Amo hai sungkuoin hi quarters thar hi an hluo nghal.
