November ni 11, 2022, Zirtawpni zâna ṭan tah, ICI Meghalaya West Presbytery Khâwmpui a vawi 47-na le Meghalaya ICI kohran kum 50 tling lâwmna hunser, ICI Sub-Hqtrs, Shillong biekina innghat, “Hi Chen Hi Lalpain A Mi Ṭhangpui” ti thupuia hmanga um November 13, 2022 zân khan ropui takin hmang zo a lo ni tah.
November ni 12, Inrinni zingkâr Presbytery Musical Board keihruoina hnuoiah, Presbytery Musical Annual Session nei a ni a, Palai 15 lai fê khâwmin rimawi le hla tienga hmasâwnna ding le inzawmin ro pawimaw tak tak hai rel a nih.
November 12, Inrinni zing dar 10:00 AM in Presbytery rorel sunzawm nawk nghâl a ni a, hi huna hin Presbytery sûnga khaw hran hran a inthawka Palai 65 fê khâwm han ro pawimaw tak tak an rêl.
Hi huna hin Meghalaya ICI Kohran, kum 1972 January thlaa, Singlei khuoa phun ṭan a ni a’n thawka khaw dang danga kohran a hung ngîr pei dân, District le Presbytery ṭhe tung pei ani dân, hma a sâwn tung pei dân le tu chena ICI Meghalaya West Presbytery sûnga khaw hran hrana Kohran hai ngirhmun tâwi fel deua ziekna lekhabu ‘KOHRAN RECORD BU’ tia inbuk , Presbytery Chairman, Upa Louis L. Keivom-in a ziek, International Standard Book Number (ISBN) nei thlapa print chu, Rev. Vanlalruot Joute, Presbytery Secretary’n tlângzarna a nei bawk.
Rorêl huna hin ro 22 lai thlâkin, hi taka hin ICI Meghalaya West Presbytery Diamond Jubilee Land & Building Project, Presbytery Development Board-in an draft chu pharna le en tlângna nei a ni bawk. Rorêl zo zantieng hin a’n tlungtu tuolsung kohran haiin palai hai ta dingin ruoi an buotsaipêk bawk.
November 13, Pathienni zing dar 10:00 hin Golden Jubilee Lâwmna Programme hmang a ni a, Presbytery Chairman, Upa Louis L. Keivom-in Jubilee Plaque hawngna a nei a, Jubilee Choir a’nthawkin ‘Independent Memorial’ hlapui ngai thlâk a ni bawk.
November 11 le 12, Zirtawpni le Inrinni zân haia hin Presbytery Musical Board huoihawtna hnuoiah Tonic Solfa (Junior le Elementary) nei a ni a, Junior exam-a hin mi 4 le Elementary exam-a hin mi 4 an ṭhang bawk.
November ni 13, Pathieni zan hin Puitling Sunday School le Naupang Department final exam result puongna le lawmman semna hun hai hmang a nih.
Inkhâwmpui sung hin Pastor Richard Rosiemlien, Pastor Lalramṭan, Rev. Vanlalruot, P.S. le Pastor Lalbungsiek hai a’n thawkin sermon ropui tak tak ngai thlak a ni a, Madanrting Shillong KṬP, Sub-Hqrs Shillong KṬP, Presbytery Choir le Nk. Jerusalem Lalramsiem hai a’n thawkin Inpâkna hlapawl le malzai ngai thlâk a nih. Inkhâwmpui programme hmang sung po po hi Pu Lalliensang Inbuon, Guwahati-a ‘Inbuon Records & Picture Production’ neitu-in video coverage a thâwpêk bawk a nih.
Inkhâwmpui boruok a zângin, programme khawm a’n hawi a, a hlawtling hle ti thu dawng a nih.
