A kin tah!

A KIN TAH (IT IS FINISHED)

By Pastor Dr. James R. Ruolngul

"Chu hnunga chun Isu'n thil iengkim tuhin a kim tah ti a hriet a, Pathien Lekha Thu kha a tlungna dingin, "Ka dang a char ie," a ta. Chutaka chun bêl pakhat uoin thûra sip an intung a, chuongchun sponj pakhat chu uoin thûra inchie sipin husop hmawlah an târ a, a hmûr an hang intlun a. Chun, Isu'n uoin thûr chu a lo dâwn zo chun, "A kin tah," a ta. A lu a kûn a, a thlarau ân thla tah a."
-Johan 19:28-30

Bible ei hang en chun ei Lalpa Isu Krista hemdea a um khan a tawngbau vawi sarih ei hmu a:

1.    “Pa, anni hi ngaidam rawh, an thilthaw hi an hriet naw a ni hi” (Lk. 23:34). Ei Lalpa chu kraws ah misuol pahni karah hemdein a um a. A sawisatu Rom sipaihai khawm chu zuk hmu ngei a ta, a hektu le theidatuhai khawm chu hang hrie fu mei a tih. Annawleh nitina a theinghiltu nang le kei khawm hi a mi hriet fuk thei.

Hi huna hin theidana lungril nei loin, Pa kuomah ngaaiidam a mi la’n hni pek a nih. A thi tawm chen khawma a sawisatuhai, a theidatuhai a la hmangai em em a nih.

2.    “Titakzetin ka hril che hi, vawisun hin ka kuomah Paradisah um veng i tih” (Lk. 23:43). Hi tawngbau hi misuol, ama le hemde, Isu ringtu kuoma a hril a nih. Misuol pakhat lem chun a deusawa, “Krista chu i ni naw amani? Insukdam la, keini khawm mi sukdam ta la” a hang tih a. Pakhat lem chun a hala, Isu thil a suksuol naw zie hrilin, Isu kuomah, “Isu, i ramah lala i hung pha leh, mi hre zing rawh aw” a ti lei hin hi tawngbau hi Isu in a hung hrila, Paradisah a um ve ding thu a hung hril a nih.

Paradis hi Thuthlung Hluia chun thil intanna, suol khawm la um nawna hmun, ropuina rama an ngai a na. Hi ngaituona hung um peiin Judahaiin Messie an beisei leia Messie in hi hun le hmuna ro a relna ding angin an hung ngai peia. Chu ropuina hun la hung ding chu tiena Eden huon ropuina ang ding chun an beisei a nih. Judahai chun hi hmun hi mihriem hriet nawna hmun, ringnaa an pahai an chawlhadamna hmun dingin an ring bawk a nih.

Thuthlung Thara hin paradis ti hi vawithum hrilin a um a (Lk. 23:43; 2 Kor. 12:3; Thup. 2:7). Hienghaia hrilnaa khawm hin Paradis hi chawllawkna hmun, mi an thi chara an fena dinga hril vawng a nih. Tuta ei tiem meka mi khawm hi a na, Lazar a thia a fena khawm kha hi le hril hme thei a nih.

A ieng ieng khawm nisien, hi tawngbau khawm hi ngaidamna tawngbau, sandamna tawngbau, Lalpa Isu Krista mission ropuitak chu a ni bawk a nih.

3.    Chun, Isu'n a nu le a inchûktir a ihmangai kha a kâwla ngir a hmuh a, a nu kuomah, "Nuhmei, en ta, i naupa kha!" a ta. Chun, inchûktir kuoma khawm chun, "En ta, i nu kha!" a ta. Chun, chu chena inthawk chu, chu inchûktir chun amanu chu a inah a ṭhuoi tah a. (Jn. 19:26-27). Isu le a nu Mari hi ei hmu khawm nawk a nih. A rawngbawl tan, Kana khuoa le tuta a tawpna Kraws bulah. Chanchintha Johan a chauh hin kraws bula Mari chanchin ziek a nih.Kraws bula le Kana khuoa khan Isu in a nu “nuhmei” a ti ve ve a. Bible thiem thenkhat chun hienga “nuhmei” a hei ti el hi Genesis 3:15 a, “nuhmei” a ti, a thlain setan lu a la sukthitling ding thutiem le Thuphuongsuo 12 a “nuhmei nisaa inthuom” a ti hi a thl$r kawp a nih an ti a nih.

Isu nu le ama hmangaituhai lungril chu hi huna hin na hleng a tih. Luka 2:35 a a nu Mari meu khawm a lungril ngunhnamin la sunthleng a tih a ti kha a hung tlung tah a nih. Amiruokchu, hieng hun lai khawm hin Lalpa Isu Krista chun a hmangaituhai hmangaina a suk langa, a nu enkawltu ding a hung ruot pek a nih.

4.    “Ka Pathien, ka Pathien, ieng dinga i mi maksan am?”(Mat. 27:46; Mk. 15:34). Hi thu hi Mathai le Marka zieka krawsa Isu tawngbau ziek sun a nih. Lalpa Isu chun, hnuoia a sin a zona ding chu a harsa awm ngei. A Pa ngaiin a khek a. Mihriem Isu, a Pa le Thlarau Thienghlimin an maksan ang ela a um chu hang ngaituoin a nat dan ding zie chu. Anni chau an ni nawh, a inchuktirhai khawm an tlanhmanga, an maksan vawng a nih (Mat. 26:56; Mk. 14:50). A hmangaitu takhai khawma hlataka inthawkin an hung thlir (Mk. 15:40) a ti a nih. Lalpa Isu lungngai le nat tuor chu a thlasiet thlak ngei!

Amiruokchu hi tak hi a nih Isu ropuina chu. Eini khawm ei khatin thina ei tuoka, Isu khawma a khatin thina hung tuokin suol saltangnaa inthawkin a mi hung sansuok lem tah a nih.

Sam 22:1 a mi char hi tawngbau hi a hung hmang a nih. Chang 16-18 naa “ka kut le kehai an sun thlenga, ka silfenhai an insem” a ti lem hi chu David a hla nisienkhawm ama hun lai hin inhemdena la um ngai lo a na, Lalpa Isu Krista tuorna hi a lo hrillawk chieng hle a nih.

Isu hieng ela a hung tuora, mi lungril a them naw a ni chun Ama hi ei la hriet chieng naw ning a ti ie! A thina hin ei dama, “Pathien le mihriem inkârah Palai pakhat chau a um bawk a; ama chu mihriem, Krista Isu, mi po po intlanna dinga inpe chu a nih; chu chu a hun tak peia inhriettirin a um ding a nih” (1 Tim. 2:5-6) a ti chu ama hi a nih.

1 Peter 2:24 a a hril, Isai 53 a mi, “ama ngeiin a taksain thinga khan ei suolhai a phur a, ama vuokna invuolhai chun sukdamin in um tah a” a tia inthawk hin vawisun hin damna chu ei hmu a nih.

5.    “Ka dang a char ie” (Jn. 19:28). Hi thu chau hi Isu mihriem a nina suklangtu nia hril hlak a nih. Amiruokchu, ei hang en tak tak chun, a mihriem ninaa a dang a char chau ni loin a mihaiin ama hi hrehai sien ti chu a nuom em em zie ei hmu thei. Samari nu le an inhmu khawm khan “Tûkhawm hi tui dâwn taphawt chu an dang châr nâwk a tih; tûkhawm an kuoma ka pêk ding tui dâwn taphawt ruok chu, kumkhuoin dangchâr naw ni hai, keiin an kuoma tui ka pêk ding chu, an sûngah tuihnâr hung um a ta, chatuona hringna chenin inchik dawk a tih," a ti a ni kha.

6.    “A kin tah” (Jn. 19:40). Hi thu hi ei hril tum tak a ni leiin hrilfie rak loin la hang maksan phawt inla. Lalpa Isu Krista chu misuol ta dinga fekan ruoi beramte inhlan anga inhlan a ni tak leiin hnuoia a rawngbawlna chu a zo tah a, “A kin tah” tiin a hril a nih.

7.    “Pa, i kutah ka thlarau kan kawltir” (Lk. 23:46). Isu chu a tawp chenin thu a zawma, krawsa a tawngbau nuhnungtak khawm a Pa kuoma a tawngbau a nih. Ka Paa inthawk hi khawvela hung ka na, hi khawvel hi maksanin ka Pa kuomah ka fe nawk ta ding a nih a ti (Jn. 16:28) angin, hnuoia a sin a thaw zoin a Pa kuom tieng a fe nawk tah a nih.

A kin tah
Vawisun hin Lalpa Isu Krista tawngbau a parukna hi hang ngaituo tlang met inla ka nuom em em a.Hi tawngbau hi kei ka ta ding chun a ropui ka ti bek beka, an thuk ka ti bek bek bawk a nih. A thu hi ei hang hriet chienga, Lalpa Isu Krista mission, a hung dan le a hungna san ei hang hriet chieng po leh a mission a zona hi a ropui zie ei hriet el a nih.

Bat lien tak, ei ithlak thei lo ei neia. Isu chu ama bat ni lo, ei bat chu a mi thlak pek a nih. Thlak bang hrim hrim khawm a nei nawh.

Isu’n a hril tak thumal chu Greek tawng bulah ‘TETELESTAI’ a nih a. Suokhai le siehlawhai kuoma an puin thaw ding a hrilhai an thaw zo huna an hmang hlak, lim ziektuin a lim ziek a zoa, belsa ding hrim hrim a um ta naw hunah le in bawltuin a in a bawl zoa thaw ding dang a um ta naw huna an hmang hlak a nih. Chu umzie chu Isu khan a thilthaw ding kha a baksam iengkhawm a um ta nawa, a zo vawng ta leiin tetelestai tiin a zo a nih.

Chu chauh chu a ni nawh, Isu hun lai daia inthawk ta khan tax pekna lekhaah hi thumal khawm hi an ziek hlak a. Ieng leia an ziek am a na ei ti chun: Tetelestai ti hin bat po po, pek ding po po chu a kim lo um loa pek fai vawng ta a nih tina khawm a ni bawk.

Chuleiin, vawisuna Lalpa Isu Krista ei ta dinga a thina hin ei bat po po chu ama hin a pek fai vawng tah a, a kim lo iengkhawm um loin a peka, tuta inthawka chatuon chen khawma bat um ta ngai lo dinga a pek a nih tina a nih. A san chu Tetelestai ti hi thil zo ta hnung hrilna, amiruokchu thil hnung chau ni loa tuta le hma tieng peia khawm zo zinga um tah hrilna a ni a. Lalpa Isu’n “A kin tah (tetelestai)” a hang ti hin “a zo tah, zo a ni tah, zo la ni pei a tih” a tina ang a nih. Isu thilthaw hi hun khata thil tlung nisienkhawm chatuon chen dai a nih ti hriet thei a nih.

Chu chu a na, Hebrai 9:25-26 chun, “nisienlakhawm, Thiempu Laltak chu kum tinin, mâni thisen naw, thisen chawi puma Hmun Inthiengah a lût hlak angin, ama chu mâni inhlân rawp dingin a lût naw bawk a, chuongchu ni naw sienla leilung insieng tira inthawk vawi tamtak a tuor ta ding a na; nisienlakhawm, tulai hun tâwpa hin inthâwina dinga inhmang fâwmin, suol sukbona dingin vawikhatah a hung inlang ta nghâl a nih” a tina san chu.

A ni leh, ieng thil tak amana a zo hi? Ieng thaw ding taka hung amana? A san chu ei hril vet vuot tah a, a hriet khawm ei hriet tah. Amiruokchu hi thu hi a bula inthawkin hang hril nawn nawk inla ka nuom a. Chu chu ka la hung hril ding a nih.

Hi thu ei hril ding chun Genesis a inthawk ei hung hril lut a ngai a. Isu Krista a hungna san, a thina san chu mihriem thuawinawna, Adam a bawsietna lei kha a nih.

Tukum ei kohran thupui khawm “THUAWINA” a nih a. Adam bawsietna le suolna kha mihriem thuawinawna tawpkhawk a nih a, Lalpa Isu hunga a thina hi thuawina tawpkhawk a ni ve a nih.

Mihriem siema ei um khan Pathien le lenghmunkhat dinga siem ei na. Amiruokchu mihriemin Pathien thupek ei zawm naw lei khan suolah ei tlu a. Suol chun mihriem chungah thu a hung nei lem tah a nih.

Rom 5:12 a chun, “mi pakhat leiin suol khawvêla hin a lût a, suol leiin thina a lût bawk a; chuong ang bawkin mi po poin thil an lo suksuol ta leiin thinain mi po po a fang suok tah a” tiin chiengtakin a mi hril a nih.

Genesis 2:17 a “i fak ni ngeiin i thi ngei ding a nih” a ti ang khan mihriem chu taksa thina chau ni ta loin thlarau thina, Pathien le inthena chu a hung tuok tah a. Pathien leh an lenghmunkhat thei ta naw a nih.

Hitaka hin Adam chau a suksuol nawh a, chu suolna chu mi po po chungah a hung um tah a. Rom 3:23 a chun, “Mi po poin thil an suksuola, Pathien ropuina an chang zo ta nawh” a ti khan hilai hi a hrilfie hle.

Tirko Paula bawkin, “Adama inthawka Mosie um chenin Adam bâwsietna anga thil suksuol nawhai chunga khawm thina chun ro a rêl hlaka” (Rom. 5:14) tiin a hril a nih.

Lal David khawma, “Ngaita, rîtlonaa inngîrin ka uma, ka nuin suolin a mi vawna” (Sam 51:5) a lo ti bawk.

Chuongchun, mihriem ta ding chun thina, taksa el ni loin thlarau thina chu a chan a hung ni tah. Beiseina hrim khawm nei loin suol thuneina hnuoiah a um tah a. Thim hnuoia khawsain a ditna tieng hrim hrim suol tieng awn le thim tieng a hung ni tah a nih.

Chu mihriem suola um zinghai sandam ding chun tu dang khawm a thei an um ta nawh, Isu Krista chau naw chu. Amiruokchu, thawklekhata, “Aw kei zu feng ka ta, intlanna zu siem ka tih” ti el a ni nawh. Sandamtu lampui hung hraw hi a harsa a nih. Hnuoia a leng laia mihai hmusit le hnengde a tuok chau kha a ni nawh.

Pathienin sandamna a hung siem hi thil awl ai chu a ni ta naw tawp el. Pathien meu mihriema hung insienga, kros a a hung thi el hi thil ropui tawpkhawk, mihriem hrietthiemnain a hrietthiem thei lo chu a nih. Hi lei hin a nih 1 Korinth 1:18 a khawm, “Kraws thu chu bohmang zinghai ta ding chun invetna” a lo ti hrim a nih.

*

Mihriem chu Pathien le inpawla fellowship nei dinga siem ni inla khawm suol leiin ei inzawmna a lo intan tah a. Pathienin a mi hmangaina nasatak lei chun mihriem chu suolin lo tlu ta sienkhawm Genesis 3:15 a chun, Pathienin sandamna thutiem a hung siem tah a: “nang le nuhmei hi indotir ka ti cheu a, i thlahai le a thlahai khawm lân dotir bawk ka tih; ama chun i lu la sukthitling a ta, nangin a kekhawng la sukthitling i tih,” a ta. Hi thua inthawk hin Pathien chun a phuta mihriem le lenghmunkhat, fellowship nei dinga a ti dan anga iengkim siemthat nawk a ni theina ding lampui a hung tiem a nih. Hi hi chanchintha hmasatak (protevangelium) tiin mithiemhai chun an hril dan a nih. Chu thla chu Lalpa Isu chu a nih.

Lalpa Isu Krista a hung ding hin kum 4000 lai hiel hun a laka. Genesis 3:15 a sandamtu la pieng ding hrillawknaa inthawk hin setan chun a lampui nasatakin dang a tum hlaka. A thei tawpin setan chun mihriemhai chu a suksieta, harsatna an tlung tira, Pathien thlang hnamhai chu a thaw nasa bik a nih.

Mihriem thla, a tha tieng phawt chun buoina an tuok pei a. Kaina le Abel chungthua khawm ei hmu thei. Mihriem nun a chawkbuoia, Pathien lakah nasatakin an hela. Pathien mi thlanghai laia lem chu a che nasa em em. Mihriem hung inthla sawng peiin sandamtu hung suokna ding line lem chu a buoi em em a nih. Abraham in Isak a hung neia, harsatna tamtak karah. Isakin Jakob a hung nei nawka. Jakob nauhai laia Juda lem chu a chawkbuoi nasa khawp el. A san chu Juda hi Sandamtu la hungna ding line a ni tlat leiin. Jakob chun a nauhai mal a sawmnaa kha “Lal hmawl chu Judaa inthawk hin bo naw nih a, Roreltu hmawl chu a ke kara inthawkin bo naw bawk a tih; A neitu takpa a hung hmakhat chun; Hnam tinin ama thu awi an tih” (Gen. 49:10) a ti a. Amiruokchu Juda naupasalhai Er le Onan chu an suol leiin Pathienin a that der el a. Sandamtu hungna ding line chu a buoi nawk tah. A chanchin sei deu hril loin, a tawp a tawpa chu a monu Tamar leh naupasal Perez an hung nei tah a.

Amiruokchu Deuteronomy 23:2 a chun, “Sâwn chu LALPA mihai pungkhâwmhai lai chun a ṭhang ding a ni nawh, a thlahai khawm suon sâwmna chenin LALPA mihai pungkhâwmhai lai chun an ṭhang ding a ni nawh” a ti bawk si. Chuong ang el chun maw Sandamtu a hung el ta ding chu?

Amiruokchu, Pathien rorelna ropui zie hienga hun harsat a khawm hin hmu thei a ni zing hlak. Perez hi sawn nisienkhawm, Deuteronomy 23:2 ei hang en chieng chun, “a thlahai khawm suon sawmna chenin LALPA mihai pungkhawmhai lai chun an thang ding a ni nawh” a tia hin Perez a inthawk a suon sawmna hang en hman ro; Ruth 4:18-22 dam, Luka 3 a dam hmu thei a nih. A suon sawmna chu lal David kha a nih. Hi lal David hi a nih, a chungchanga Pathien thuthlung tamtak um chu. Sam 132:11 chun, “LALPA chun David kuomah thutakin ṭawng ân khâm tah a, Chu chu nghatsan naw nih. "I taksa raa mi i lalṭhungphaa chun inṭhungtir ka ta”a ti dam, Jeremiah 23:5 a, “David-a hin kau feltak chu hung inṭotir ka ta, ama chun lal angin rorêl a ta, vartakin thâwng a ta; rama chun rorêlna le felna chu suksuok a tih” a tihai dam a um chu.

Hieng ang hin a nih, setan chun sandamtu a dang tum ngat ngat chu. Amiruokchu Pathien remruotna chu dang ruol hrim a ni nawh. A changin a line hi intan vang vang hlak sienkhawm lampui a hung um pei el a nih. A chang chu nawchizawr dam, hnam dang nuhmei (Ruth, Moab mi) dam a hmanga, a fe pei tho a nih.

Chuong lai chun mihriemhai, a mi Israelhai khawm chu an suolna leiin an hung tlusie peia. Pathien chu a mihai laia um nuom sienkhawm a mihai chun an nghatsat tah a. Adam a thuawinawna lei khan mihriem chu suol tieng an awn zing ta sih a.

Israelhai khawm chu an suolna leiin Pathienin a hrem tah a. Hun harsatna an tuok lai takin zawlnei Isai chun: “Nunghak inthieng pakhat inrai a  ta, naupasal nei a ta, a hmingah Immanuel sak a tih” (Is. 7:14) ti hrillawkna a hung siem a.

Zawlnei Isai chau ni loin zawlnei danghai khawmin Pathien chu a mihai lai a la hun ding thu hi an lo hrillawk a. Ezekiel khawma, “Ka biekbuk khawm chu anni lai chun um a ta, an Pathien ning ka ta, anni chu ka mihai ning an tih” (37:27) a lo tih a. Zekaria khawma, “Aw Zion naunu, him la, hla sak rawh, en ta, ka hung mek a, nangni lai chun ka cheng ding a ni sih a, LALPA chun a tih” (2:10) a lo ti bawk.

Hi zawlnei Isai a hrillawk hi kum 700 a liem hnungin Lalpa Isu Krista chu Bethlehem ah a hung pieng chauh a nih. Lalpa vantirko chu a pa Joseph kuomah mangin a van lara. Mari nau pai chun hming pahni a nei ding a lo hril tah a. A hmasa lem chu “Isu: a mihai an thil suksuolnaa inthawkin a sandam ding a nih sih a” (Mat. 1:21) tiin. Hi hi Isu hming umzie chu a nih: Jehovah in a sandam. A pahnina chu Immanuel ti a nih.

Immanuel – Pathien ei kuomah a um ei ti hin Johan chanchinthaa a hril, “Thu chu Pathien kuomah a um, Thu chu Pathien a nih” (Jn. 1:1) a ti le “Thu chu tisain a hung inchang a, eini lai a hung um tah a” (Jn. 1:14) le hin a hung inmil thlap a. Chu Thu, Pathien kuoma um, Pathien, eini laia hung um ta chu ei Lalpa Isu Krista, Pathien chu a nih.

Hilai thu, Pathien le mihriem inkara inremna thu, Pathienin mihriemhai ta dinga sandamna lampui a hung buotsai ropui zie le a lampui harsat zie hi hang hre chieng inla nuom a va um ngei de. Hi thu hi ei hriet chieng a ni chun Pathien meu mihriema a hung insiem el le Lalpa Isu Krista thina ropui zie hi hre thei ei tih.

Pathien le mihriem inkara palai, sandamtu chu Lalpa Isu Krista naw chu an um naw a. Lalpa Isu Krista thuawina leia a hringna, a thina le thonawkna lei chauin chatuon hringna chu a um a nih.

Krista chu mihriema hung insiengin, taksain a tuor chau nilovin, misuolhai aiin a thiha. Pathien tawngsie Adam thlâhai po po chunga um chu a taksain a phura. Suol intlanna dingin a hringna a hung pêka. Chu lei chau chun sandamna a hung um thei a nih. Paulan, “Ama chu Pathien felna ei hung ni theina dingin suol hrim hrim hrelo chu Pathienin eini leiin suolah a siema” (II Kor. 5:21) a tiha. Peter chun, “Suol tiengahai thitahin felna tienga ei hring theina dingin, ama ngeiin a taksain thinga khan ei suolhai a phura, ama vuokna vuolhai chun sukdamin ei umtaha” (I Pet. 2:24), “Pathien kuoma a mi thuoi theina dingin Krista chu suolhai leiin vawikhat a tuor bawk siha; mi fel chun mi fel naw aiin a tuora, taksaa sukhlumin a uma, thlarauva ruok chun sukhringin a umtah” (I Pet. 3:18) a ti a nih. Zâwlnei Isai khawmin, “Ama chu mihriemhai hmusit le ditnawhin a uma; lungngaina nei mi le natna hremi a na, mihaiin an hmai an hip san ang ang chun ama chu hmusitin a uma, …ama chu ei bawsietnahai leiin inhliemin a uma, ei khawhlonahai leiin vuokthidukin a uma; ei thlamuongna dinga thununna chu a chungah a tlaa, a vuokna invuolhaia sukdamin ei umtah” (Isai 53:3-5) a lo ti a nih.

Mathai 27:50-51 ei hang en lem chun hieng hin an ziek a: “Chun, Isu chu rawl inringtakin a khêk nâwk a, a thlarau ân thla tah a. Chun, ngai ta, Pathien biekina puonzâr chu a chung tienga inthawkin a hnuoi tieng chenin, a lo tlêr suok tah a;” a ti a nih. Isu hun lai khan Jerusalem temple a khan Mosie dan angin inthawina ringumtakin an thaw hlak a. Hebrai 9:1-9 ziek ei en lem chun hi temple a hin hmun inthieng tak hmun umin, mihriem chengna le Pathien chengna hmun a um ti ei hmu a. Thiempu laltak chu hi hmun inthieng taka hin kum khatah vawikhat chauh a lut phal a nih (Ex. 30:10). Hitaka hin ran thisena inthawiin Israelhai suolna leia inthawina a nei hlak a nih.

Hmun inthieng tak le temple inthenaa chun puonzar siein a um a. Chu puonzar chu a tler awl reng ni loin, puon thatak an hmang a nih. Exodus 26:31 a chun, “"Chun  puonzâr sahmul dumpâwl, a êm  le seninlâr le pat zai inhmi-kawpin siem i ta,  cherubhai lim kutthiemtaka siem haia cheia siem ding a nih” a ti angin nuoma zuk inthler el chi ni naw tawp a tih.

Amiroukchu, hi puonzar hi a lo inthler thu ei hmu a nih. Hi khawm hi hril ding tamtak um sienkhawm Lalpa Isu Krista thina hin Thuthlung Hlui huna thiempuin kum tin thisena inthawi kha a ngai ta naw zie a suk lang a nih. Hebrai 9:12 khawmin, “ei ta dingin chatuona intlanna hmu tain, kêlte le bâwngte thisen lei ni loin, ama thisen lem leiin, Hmun Inthienga chun vawikhatah a lût thleng ta nghâl a” a ti a nih. A thina hi chatuon dai a nih a, ran thisen a ngai ta naw a nih.

Pu Thangzarlien a hla phuoka, “Aron inthawinahai chu a ngai ta naw, Lal Krista thisen ka suol inthawina a nih, Vana lallukhum ka chang ve theina di’n, Krista’n ka suol po po ngaidam tah” a ti kha a nih.

Thukharna
Mihriem suola an tluk ta hnunga Pathienin sandamna lampui a hung buotsai chu a hungna ding setanin dang tum sienkhawm a dang thei nawh. A tawpah sandamtu chu hung piengin hnuoia rawng a bawl laiin harsatna chi dang dang a tuok a. A unauhai, a mihai, Rom sipai le mihai le sakhuo mihai po poin an theidaa. An heka, an hnawchepa, an lo ring nuom nawh. A hungna a harsat em em vei leh a mihaiin an lo pawm nuom nawh.

Amiruokchu, Pathien remruot chu a thlawn ngai nawh a. Hnuoia hungin an ngaitlawma, Pa thuawina le a mi hmangaina leiin rinum tuorin ei ta dingin kraws a chun hemdea umin a lo thi tah a nih. A lungngai thlak hle lai zingin thu lawmum, chanchin lawmum bek bek a nih.

Hnuoia mihriemhai sandam ding le beramte ei aia thi dinga a hungna chu a thaw zo ta leiin a thaw ding chu a zo tah a – Sandamna a zo tah a “tetelestai” tiin a rawngbawlna chu a tawp tah a nih.

Our Address

ICI Secretariat,
Sielmat, PO Box - 3,
Churachandpur - 795128
Manipur, India

Email: hq{at}ici.net.in
Website: https://www.ici.net.in

Our Location

© 2019 Independent Church of India | https://www.ici.net.in. Our site is a secure site using SSL and encrypted content.