A kin tah

By Rev. Joe Sanghmingthang Khawbung,
New Delhi

Johan 19:30. Chun, Isûn uoin thur chu a lo dawn zo chun, “A kin tah,” a ta. A lu a kûn a, a thlarau ân thla ta a.

Isu Krista’n Sandamna  a hung buotsai hma po hin buoitlâk um takin sûol inthawina an nei hlak a. Pathien chu thienghlim Pathien a ni leiin sûol le inpàwl thei lo a nih. Chu Pathien thienghlimna lei chun mihriem sûola lo tlu tahai chu Pathien le ṭhehran an nih.

Thuthlung Hlui huna  khan Pathien hmabula thienghlim le inlang ding chun ran thisenin an inthàwia, chu naw chun Pathien hmabûlah an inlang thei nawh. Mihrîem hlak kha sûol ta laklaw ei ni leiin, ei suol zìng zîng el bawk si a, rân thisêna inthâwi nâwk pei a hung ṭul ta a nih. Tulai khawm hin lan thâwi zing ding ni inla, khawlâi rânin am a mi dai seng ding chu.

Israel-hai kha zîng le zanin an inthawi khawma, an lo suol nâwk pei leiin thil buoitlâk tak a hung ni a, inthâwi seng lo suolna mipuihaiah a um leiin Pathien hnai rûol lovin an um ta a nih.

Amiruokchu, Isu Krista intlanna a hung sîem ruok hi chu zîng le zana inthâwi ngai ta lo dingin, sûol intlanna dinga a tawpna le a vawrtawp a nih. Vawikhatin a rêngin nang le kei a suolna pô pò a sawpfâi vawng a, a bo-a-bâng um lovin sûol an tlan fâi vawng a nih. Ringnaa pantu ta ding chun Isu Krista inthawina hi chatuona sûol ngaidamna dingin a huntâwk zet a nih.

Isu’n “A kin tah,” a ti hin, “a rêngin pek a nih,” "sûol pô pò ngaidam a ni tah," a tina ang tluk a nih. Isu Krista kha Pathienin thaw dinga a ti ei suol man a famkima pe dinga hung a nih. Pa Pathienin sin thaw dinga a pek chu a rêngin a thaw zo tah tina a nih.

Isu Krista thina khan buoitlâk um taka sûol inthawina an lo thaw hlak chu a tawp ta a. Ama suolna hrîm hrìm nei lo chun suolna chu ama chungah innghatin a pek fâi vawng ta a nih. Chuleichun, sûol le inpawl thei lo Pathien chu Isu Krista ei aiawtu le ei ta dinga a thilthâw zarin nel takin ei pàn thei ta a nih. Ei va vangnei de!

Isu Krista thina le thonâwkna ringtu chu Pathien leh chatuonin a lêng hmunkhat thei ta a, sûol man thina chu a pumpel ta a nih. Thienghlimna hrim nei lohai chun Isu Krista thienghlimna ei inṭawmpui ta a, felna hrim nei lohai chun Isu Krista felna chu ei inṭawmpui a. Pathien rôpuina chen khawm chang thei ding ngirhmunah ei um ta a nih.
“A hmangina a hung lutin,
A thisênin a mi lo sawpfaia;
A felnaa mi hlângkaiin,
A rôpuina chena chang ve dingin.”

Isu Krista zara ei chang hi a ropûi ngawt el, ei chang phak lo ding, ei ni phak lo ding, ei nei phak lo ding, arté lukâwng iengkhawm nei lo kha, Lal nau nina a mi pek a, khawvêla pieng pô pòva mi hamṭhá takah a mi siem ta a nih. I vangnei zie hi i ngaitûo rawp hlak am? Isu ei ta dinga an pekna, a mi hmangai zie hrechîengtu ta ding chun ama ta dinga inpêk chu thil awlsâm tak a nih.

Bethesda Center, New Delhi
20th April, 2019

Our Address

ICI Secretariat,
Sielmat, PO Box - 3,
Churachandpur - 795128
Manipur, India

Email: hq{at}ici.net.in
Website: https://www.ici.net.in

Our Location

© 2019 Independent Church of India | https://www.ici.net.in. Our site is retina display ready and secure with SSL and encrypted content.