Delhi Kohranah Thlarau Thienghlim

“Hi lungpui chunga hin ka kohran rem ka ta; chu chu mithi khuo kul kawtkhârhai khawmin ngam naw nih,”

– Matthai 16:18

Pathien lunginsietna le thatna zârin saktieng ram Philippines le Thailand haiah a mi thuoi a. Hnam thil takah Hmarhai Chanchintha leia ei hamthat bîk zie mi’n hmûtirin a mi’n hrietdawktir thar a. Manila City le Bangkok khawpui hausaknahai ang chang phâk naw inla khawm, vânram changtuhai ei ni leia lâwm ding ei nizie le hamthat zie a mi’n hmûtir bawk a.

Rawngbâwlna ding tamtak mi’n hmûtira saktieng unauhai a mi’n hmêlhriettir hnungin, ka ring phâk thak lovin khawvêla rambung hausa po po um khâwmna Europe tieng hmêlhriet a mi siempêk nâwk a. Europe ah khawm a Thuthlung a tlung indikna hmun ngei - a hnam thlang Israelhai chunga a hrillâwkhai tlungkimna hmun pawimawtak - Poland ah program a mi siempêk nâwk a.

Chu thil chun Pathienin thiltum pahni, ka lungrila umhai mi sukpuitlingpêk a tum a nih ti tuta tum Foreign a inthawk ka hung kîr hnungin ka hriet suok chauh a nih. Pathien remruot dânhai hi a lo mak thei khawp el!

Kum 2013 thupui ah “I ram hung tlung rawse!” ei tih a. Pathien ram chu – abîkin – New Delhi ah a hung tlung tah ngei a. Mi tamtak an lo buoi a. Kei chun, ram le hnam buoina khawpa Pathien ram hung tlungna chu a tak ngeia mita hmu châk a um de aw, ka tih a. Delhi ICI kohran (Bethesda Church) a hang inkhâwma, Pathien ram hmangaituhai laia thung ve a, a tak ram ngeia iengkim pal tlangtu Rev V. Ramchuoilo thuhril hang ngaithlâk hi ka châk dawp dawp zing a. Delhi fein inkhâwm ka tih ti ruok chu ka la mang phâk naw tieng a nih.

Ka beiseina khêl tieng le ka remruotna nêka thalemin Pathienin rem a mi hung ruotpêk tah a. Ka tina san chu; Europe-a rambung inzawmkhâwm 24 haiin an sinthawdân thahai (Good practices) in-share-na huna an hmang hlak, 2nd International Conference on Multi-Sector Social Enterprises an tia, November 14-15 sûng Lodz (Woodge or Wutg tia lam ding), Poland-a thang ve dingin an mi hung fiel ve tah hlauh el a. Thuhrilna hun tum hni an mi pêk nghe nghe a, International Expert (Speaker) an mi la hei ti nâwk nghâl!

Hnam hnufuol le retheihai dawmkângna dinga ka sinthaw (Poverty Reduction Project) an lo hriet ve chu ni ding a na. Europe rambunghai bâkah tuta tum chu Africa le Asia khawmuolpuia inthawkin rambung pakhat ve ve fiel sa’ng ei tih, tiin Uganda le India an thlang a. India rama chun kei an mi hung thlang ve tah a. “India rama NGO le Social Entrepreneur hai sinthawdân le in organization (Bible Hill Youth Club-Tribal enterprise) sinthaw dânhai mi hung hril ve rawh” an hung tih a.

Poland (Europe) fe ding chun VISA hmu ân tak ding a na, iengtinam aw ka thaw ding ka ti zing a. Switzerland fe tum VISA kan lo hlâwsam ta leiin ân tak dân ding ngawt chu ka ngaituo a. Chuleiin, inhma deuvin apply ta’ng ka ta, Delhi ah châm sâwt met a tul khawma châm sâwt met dingin tiin Poland Embassy ka phone a. Nov 5, dâr 10am ah appointment an mi pêk leiin Nov 4 ah Delhi tlung dingin ka’n siema.

Nov 4 ah Delhi ka hung lût ding, ti ka laibungpa Pu VL Rênga, Delhi Kohran ah Local Committee member le kohran ban pawimaw laia pakhat, Defence Ministry-a Gazetted Officer ei nei ve sunhai laia mi ka hang hril a. Kohran thuoituhai lo inberâwnin a Pathienni nâwk chu Thalai Sunday a ni bawk leh, tiin thuhrilna hun an mi lo pêk a.

Inkhâwm chauh beisei kha thuhrilna hun an mi lo pêk tah si. “Lalpa, ieng thu’m hril ka ta?” ka ti zing laiin ka lungril chun “I vânglai ni haia chun nangma siemtu che chu hre zing rawh” ti hi hril tumin ka’n singsa zing bawka.

Pathienin thiltum (Purpose) a nei phât chu lampui a lo siem lâwk vawng hlak a, ei beiseina nêka thain a mi sukpuitlingpêk hlak, ti hi a mi’n hmutir pei bawk a. Ka tina san chu, Poland fena ding chun Schengen VISA (European Union sûnga Schengen rambunghai po fe theina) ka apply a ngai a. A sâwt naw takah ni 7 bêk i nghâk ngai an tih, an mi ti leia Delhi-a châm sâwt dinga insiem ka ni rêng a. Amiruokchu, Pathien remruotna chu Bethesda Church a thuhril le inkhâwmna ding kha a lo ni sa zing a nih ti hi Foreign a inthawk ka hung kîr hnungin ka hriet suok thar chauh a nih!

Delhi ka tlung zânin International Air Ticket ka e-mail ah a hung tlung ve char a. Delhi ka tlung hma po chu Foreign fena ding Ticket la nei lo, ringnaa fe tawp ka nih. Chu chu a zinga VISA ka apply-na dinga an ngai pawimawtak, Round Trip ticket kha a nih. A zinga chun Poland Embassy ka va fe a, awlsam takin ni khat thilthuin VISA an mi lo pêk nghâl a nih!

Ni sari a ngai ta nawh. Ni sari nghâk tûl ding leia Delhi inhma deuva fe dinga ka lo insiemna kha Bethesda biekin-a ka’n khâwm theina ding lampui a lo ni lem a zing! Khawvêl dâna harsa deuh dinga ei ngai thil - European VISA - khawm Pathienin rem a ruot phât chu awlsam tein lampui a hung siem (um) el hlak a nih!

Bethesda Church ah: November 2013 Pathienni vawi hnina, Thalai Sunday, chu nghâkhla tak si, huphur ang reng sia ka nghâk lai chun a hung tlung tah a. Zântieng dâr 3pm-a inkhâwm hlak an ni leiin, dâr 2:30pm chun Pu VL Rênga hai sûngkuo leh Mahipalpur (IGI Airport kâwl) tieng kan tlân veng veng tah a. Rev V. Ramchuoilo chun phone-in, “Zâm thak lovin Pathien thu tha i ti ti, i nuom nuom i hril teu ding a nih,” a mi hung tih a; a mi sukhrât (Encouraged) hleh a.

Suknawmnatna lo tuor hrep a, Isu Krista hming leia dârthlalang tukverhai dêng kawi tuok a, tawng tha naw tinrênga khêkkhum le a compound chena meia râwna lo tuok tah Bethesda Church compound chu ka hang lût ve phawt chu an tah a. Isu Krista hming leia hrilsiet le nêksâwrna lo tuor zêk tah kohran mipuihai leh kan hang inhmu a, a sûngtieng hin Power danglam tak, hring tak le huoisen tak thilthawtheinaa khat, hmu thei si lo hriet thei si hi umin ka hriet.

A tuollai inhuonna (Compound) ringawt khawm chu zâng tak si, phûrna le thathona iemani tak a mi pêk et etin ka hriet a nih! A biekin sûng tak lem chu a Sacred hlein ka hriet! Ka ring nêk daih khan thalai khawm an lo tam a. Pu JK Simte, Pu Tawnluaia hai inhrawl hrûkin an lo um leiin thla a muong sawt bawka.

Ka’n khâwmna hmasatakah Speaker thungnaah ka hang thung chu âwmnaw ka’n ti hleh a. Amiruokchu, Pathienin a mi thangpui a. Pulpit ka kai hnung khawm chun thu thar a mi hung pêk sa pei a, ka’n buotsaina khêlah huoisen takin thu ka hril tah a; chu tak tak chu kohranhai sukhrâttu a lo ni lem a nih!

Pulpit a inthawka Pathienin a mi’n hmutir dân taka chun; Delhi ICI kohran chu nêksâwrna le hrilsietna tamtak kârah Pathienin tulai khawvêl inhnawk tak tah, kohran khawm inhnawk tah êm êm, khawpui nunhai lem chu inhnawk taluo tah, a mi le mi naw khawm hriet hrang thei ta lo vâng khawpa Setanin khawvêl le a lo inchalrempui mêkna laka inthawk chun Kohran Thienghlim a dit a. Khawvêl inhnawk tak le suolnahai laka inthawk chun - hun nuhnung a ni tah leiin - a kohranhai thlitfîm a nuom a, a thlitfîm tan mêk a nih, ti hi a nih!

Chuonga a kohranhai a thlitfîm tan mêk lai chun Bethesda Church hi a Process pakhat a nih a, chutaka thang thei dinga hung inkhâwmhai hamthatzie, an tuornahai a thlâwn naw ding zie dâm, tulai khawvêla ding chun Isu Krista hminga an tuor ve theina umsun a ni tâk zie dâm, huoisen taka thi chena ringum taka tuortu chun hringna lallukhum a hmu ding ziehai dâm a mi’n hmutir a. Chuong thu chu ka hriet naw kârin ka baua inthawkin a lo suok zung zung el a nih!

Ka’n buotsaina ka hril tak lem chu, “I vânglai ni haia chun nangma siemtu che chu hre zing rawh” ti a ni (hlak) a. Kei chun, hun nuhnung a ni tah leiin, “Vânglai nia Pathien hriet” ringawt nêkin, “Vânglai nia Pathien ihriet” hi a pawimaw ta lem a nih, ti hi a nih. “Pathien ka hriet” ti chu tamtak an um tah a. Amiruokchu, “Pathienin a hriet” chu tlâwmte chauh ei ni ding a nih. Chuleiin, vânglai nia Pathien ihriet ni hi a pawimawtak tak chu an tah, tiin.

Mak danglam takin Pulpit a inthawk khan, Pathienin a kohranhai a thlitfîm tan mêk a, Delhi kohran chu Urban Church Planting a bul tanna a nizie kha chieng deuvin a mi’n hmutir el a nih! Chun, chuonga a’n din Kohran chunga chun Hnam – ieng hnam khawm nisien – a um thei nawzie a mi’n hmutir bawk a. Kohran chungah hun hnam a um thei naw rêng rêng; hnam chu ngaitha ding le ngaipawimaw lo ding tina chu ni lovin. Pathienin Hnam (pakhat) nêka a ngai pawimaw lem chu a Kohran Thienghlim a nih!

Hnam chu thisena a inthawka a siem a ni a, a Kohran ruok chu a Naupa thisen le Thlaraua Ama Ringnaa inthawka siem a ni lei a nih. Siem hmasak (Thisena hnam) nêkin siem nuhnung lem (Thlarau hringna) chu a chunghnung lem a nih; Pathien mithmua chu. A Kohran chu Hnam tina inthawka Siem a ni leiin chu Kohran chunga chun Hnam a um thei nawh; chu chu Pathien thu a nih.

“Hi Lungpui” a ti khawm hi, Lungpui chu Isu Krista entirna ni zing laiin, hitaka Isu’n “Lungpui” a ti tak hi chu Ringna, Ama ringna kha a nih. Matthai 16:16 ei en chun, Peter-in, “Krista, Pathien Hring Naupa chu i nih,” a tih a. Chu tak chu Isu’n, “Tisa le thisenin ân hriettir che a ni nawh a, ka Pa vâna mi’n ân hriettir lem che a nih,” a tipêk a. Peter Ringna le hrietna tak kha a nih “Lungpui” tia Isu’n ân kâwktir chu, chu Ringna chu Amaa um (innghat) a ni leiin Isu Krista Ringna a nih; Kohran lung(phûm) chu.

Isu Krista chu Pathien Hring Naupa a nih ti hrietna hi mihriem hrietna le Pathien a inthawka hrietna a um a. Pathien a inthawka hrietna chun Ringna a pêk a, chu Ringna tak chu Kohran innghatna Foundation a nih.  Chu Ringna lei bawk chun tamtakin an hringna khawm chân an huom a, hringna chen chân huoma thisen suok chu Kohran chi tuna a hung ni tah pei a. Chuleiin, ringtuhai thisen chu kohran chi tu tanna khawm an ti rêng a nih.

Ringna chu ieng dang khawm ni lovin, Isu Krista chu Pathien Naupa, khawvêl sandamtu le Mimal mi Sandamtu a nih ti ringna chu a ni a. Ringna naw chun Ama lâwm zâwng ni ruol a ni naw bawk! Chu Ringna lungpui chunga chun a Kohran hai a rem a. A Kohran rem chu nei vat a nuom tah leiin a thienghlim thei patâwpa sukthienghlim a nuom a, tuhin a sukthienghlim tan zing tah a nih!

Chuonga Ama ringnaa innghat, Amaa rem Kohran chu khawvêl mihriem le Setan le rawihai (Mithi kulkawtkhârhai) khawmin an ngam naw ding a nih! Taksa khawvêlah pâwl le Association, lalram le sawrkarhai, thlarau thilah Setan le thlarau suolhai khawmin an ngam lo ding chu a nih!

Thlarau Umpuina (Presence): Hieng thu a mi pêk laia Delhi biekin sûnga hla kan sak lai chun, Thlarau Thienghlim umpuina (Presence) chu ka hriet (Feel) thei a; mitthli a suok naw thei nawh! Thlarau Thienghlim a chêngna hmun inhawi dân chu; ei tap a suoka, mitthli a luong a, anachu inhawi tak a nih. Khawvêla vuongna lientak Boeing 747 Super Jumbo Jet hmanga Airlines changkâng tak Lufthansa Airlines vuongna sûnga chuonga sûm chungtienga vuong nêk khawmin ân hawi lem a nih!

Biekin sûngah khan Thlarau Thienghlim a chêng (a um) ti chieng takin ka hriet a, “Lalpa, hitaka khawm hin i lo um (pui) zing a ni maw?” tiin, a mi pâwl nuom leia lâwmna mitthli kha a luong suok naw thei naw a nih! Lâwm leia mitthli leh, hnukin a mi ul a, bauva hla sak suok khawm ân taka chu lungrila tingtang keipêk chu a theia, ân hawi êm êm ringawt el a nih!

Thlarau Thienghlim umna hmun chu “Vânram thla fuol” a ni ringawt el! Chutak chu Delhi biekin sûngah khan ka’n tem a, ka vângnei hle. Foreign ram changkâng tak tak haia sâwt tak va um nêk khawmin, Thlarau Thienghlim umna biekin sûnga hun tawite chauh um khawm kha thlâkhla a um ngawi ngawi lemin ka hriet! Lalpa Thlarau umna Kohran hi chu a lo va’n hawi de aw!

Ei biekin sûngahai hin Lalpa Thlarau a la um am? Thlarau Thienghlim chênchilna hi ei biekin inkhâwmnahaia hin a la umin ei hriet hlak am? Tu (ieng) kohran khawm nisien, ei biekin sûng haiah Thlarau Thienghlim umpuina (Presence) ei hriet ta naw chun ngaituo um tak Kohran nîng ei tih. Thlitfîm a tul ve tah nîng a tih! Thlarau umpui (chênchil) Kohran hi a pawimawtak a nih!

Thukhârna: Hril nuom tam hle sienkhawm, thukhârna dinga ka la hril nuom chu; Independent kohran khawm Pathien malsâwmna ei dawng nasa tah a. Taksa thil taka lem chu kum 40 vêl chauh thlîr kîr khawma intlau tak a ni tah! Taksa le material malsâwmna chu ei dawng râwn tah. Thlarau malsawmna tieng ei ngaisak ta naw tan nia ân lang leiin Pathienin chu tieng chun mi la thuoi nawk a nuom leiin Thlarau tienga ei hrâtna ding a mi la siempêk nâwk a nih, ti hi a nih. Tuorna le nêksâwrna thang lovin Thlarau a hrâtin ân thanglien thei si nawh!

Tuorna khêla thlarau malsâwmna intem nâwk dingin a kohranhai a mi dit a. Setanin ei mithai a sukdela, thlarau Kohran nêka taksa kohran dâm, khawvêl thila mawinahai dâm, Pathien thu ni sia sûngril hringna tak tak them phâk ta lo Chanchintha-in a mi hlêm tâwl a. Chutaka inthawk chun mi keidawk nâwka mi thlitfîm a nuom a nih!

Pathienin a mi la hmangai si leiin a Kohranhai chu - Ama ringtu inti vêkhai lai khawm - a thlitfîm tan tah a nih. Chu thitfîmna process-a chun thisen inzawmpui dâm, sûng-le-kuo dâm, u-le-nau dâm, nu-le -pa le nauhai dâm thehrangin ei um ding a nih. “Ka hming leia a nu amanih, a pa amanih, a unau amanih mâksan/tlânsan (the) ngam naw chu ka mi ni thlâk a ni nawh,” ti hih a tak takin Kohran sûngah a tlung mêk (pei ding) a nih!

Ringtu Kohranhai hi ei ngîrhmun sukchieng a hun tah a; lum leh lum law law, dei leh de law law hun an tah. Lum lo dei lova um thei an ta nawh. Chuleiin, Delhi ah khawm Kohran ah inkhâwma Fellowship ah khawm inkhâwm bawk ding tia mihriem remruotna chu Remchângnawna a hung siem a. Ama remruot angin Lum hlawt hlawt dingin, lum ta si chun Lum hle ding le lum zui pei dingin a kohranhai a buotsai el a nih!

Mihriem varna le remhrietnaa rêl thu chu Pathienin a kal thlâk pei el a nih! Chuleiin, a mi la hriet fûka Kohran a sukthienghlim tan mêk lai hin, eini khawm ei umnaa hin det takin, sukhnîng ruol lovin um tlat ei tiu! Thlarau Thienghlim umna Kohran nêka kohran inhawi le inhnarum khawvêlah a um nawh a. Thlarau Thienghlim chênchil ta lo Kohran chu ieng angin hausain ropui sienkhawm, thi a nih!

Mihriem varna le hrâtna khawma iemani chen chu (rawngbâwlna khawm) thaw thei a nih, amiruokchu, Thlarau Thienghlim a thang ta naw chun thi a nih! Taksa thil (Material)-a hausakna, mihriem remhrietna le varna, rorêlna le remruotnahai hin Thlarau Thienghlim a suk nuor hlak.

Khawvêl hmun hran hrana ei mi le sa – Kohran – umhai hi Pathien thutak anga ei bawzui peia, hrilsietna le demna kârah huoisen taka Kohran indiktak le thienghlim ei phun pei chun Thlarau Thienghlim umpuina khawm chang zui pei ei tih ti hi ring a um a nih! Chu chu Pathien lâwmzâwng khawm a ni hrim a. Mihriem lâwmzâwng nêkin Pathien lâwmzâwng thaw le zui hi a tha lem rawp hlak bawk a nih.

Thubel: 64th General Assembly 2013 tawptak zâna Rev Dârsânglien Ruolngul thuhril, Church Growth and Urban Church (Khawpui Kohran) ti thu kha tulai khawvêla dinga pawimawtak a ni tah. Ei mi-le-sa, abîkin thalaihai, khawpui pan an tam deuh deuh a. Hmar Diaspora hi khawvêlah ei indar lien pei tah a. Mâni root – pieng le mûrna, tobul le Kohran innghatna - khawm hre chang ta lo an tam deuh deuva.

Tamtak lem chu khawvêl hmasâwnna (Development)-in a chimpil mêk, Pathien thutak nêka khawvêl malsâwmna zawng le hnawt an tam lem tah a, nu-le-pahai leh ngaidân khawm kâr a hla deuh deuh a. Nu le pa nêka inchûk sâng, var le hre lem intina ân sâng tiel tiel a. Pathien thutak nêka khawvêl varnaa mi hne tumna leh Pathien Thutak inchûktirna hun a tlâwm deuh deuva. Khawpuia lem chu hun inditthawna vawng a ni tah leiin Isu Krista hi hung nâwk a tih ti ring khawm ân tak (pêk) deuh deuh a nih!

Pathien thutaka bawzuina ding Kohran hi Metropolitan haiah ei phun pei ta naw chun ei mi-le-sa, ei nauhai tamtak chu ei chang naw vat tah ding niin ân lang a. Hienghai bawzuina dinga Kohran hran hrana thuoitu le Pastor insuikhawmhaiin Pathienthu Website pathienthu.in kan siemna san khawm hi, thalaihai Pathien thutak tienga keilut (nâwk) tumna lei a nih.

Virtual World ah thalai ha’n hun an hmang râwn ta leiin Pathien thu khawm hi Virtual World (Internet khawvêl) ah an hmu thei dinga siem hi a pawimaw tah a. Online le Offline ah Pathien thua rawngbâwlna inchen chara thawdân lampui ei zawng ta naw chun Kohran khawm hi a rawngbâwlna a hlâwtling ding ang tak takin a hlâwtling thei nawna ding (san) a hung um pei el tum tah a nih.

Virtual World (Computer software) hai hi thlarau ram nizie lo entirna pakhat a nih a; thlarau rama thil thaw a awlsam dân ding le a thilthawtheina ân sâng ding zie târlangtu a nih! Software hin thlarau nizie a lo inentir a ni leiin - thlarau ram pal inthûk ta fûta inngai hai hin - hi Thlarau nizie entirna Software bawk hmang hin Pathien ram ei lâk le suklien ve a hun tah! Chu chu tulai thalaihai hne awlna tak hmangruo khawm a nih a, Kohran ta ding khawma hmangruo tangkai le pawimawtak la hung ni pei a tih!

Independent Church of India khawmin Kohran Website ei neia, a tha hle a (www.ici.net.in). Website leh a taka Biekin (The Real Church) rawngbâwlna hi a fe kawp pei ta naw chun, khawpuia ei mi-le-sa tamtakhai Thutak lampuia inthawka an pêthmangna ding ei vêng theinaw hun a tlung vat el thei a nih! Chuleiin, khawpui Kohran (Urban Church) hi Hun Thar (Chapter thar) ei chuongkai mêk laia ei Vision-Mission pei ding chu a nih. Chuong Khawpui Kohran haia ei rawngbâwlna dinga hmangruo pawimaw tak pakhat chu Computer Software (Internet) hi a ni tah a; thangthar kohran pei thuoituhai khawma Thlarau chauh ni lovin, nitin ei in-update ve pei a tul an tah!

Taksa le thlarau inthanglien peina hi Pathien thua hmasâwnna a nih a. Thlarau hringnun nitin ân thang lien pei ang hin taksa rama ei remhrietna le thiemna, abîkin computer software tieng, ei in-update pei ta naw chun Khawpui Kohran haia lem chu rawngbâwlna hi a “handicapped” (khingbai) el thei ding a nih! Kohran hi a khingbai ta chun ân chûktir Ringtuhai khawm an khingbai el ding a nih! Kohran chu – taksa le thlarauah - a khingbai a remchâng si nawh!

Kohran Khingbai ni lova Kohran det, Krista Kohran, Thutak Ban ei ni pei theina ding chun danglam zung zung Khawvêla hin danglam ngai lo Krista Kohran Indiktak, Ama Ringna Lungphûm ngeia innghat Kohran ei phun pei a tul tah.

Chu Kohran chu Thlarau Thienghlim-in a chênchil Kohran a ni ngei theina dinga thienghlim tak le fîmkhur taka indin le siem chu ei mawphurna a ni bawk a nih. Ni ngei bawk rawse! Amen!

Our Address

ICI Secretariat,
Sielmat, PO Box - 3,
Churachandpur - 795128
Manipur, India

Email: hq{at}ici.net.in
Website: https://www.ici.net.in

Our Location

© 2019 Independent Church of India | https://www.ici.net.in. Our site is a secure site using SSL and encrypted content.