Mi chapo Uzzia

By Rev. Joe Sanghmingthang Khawbung

2 Chanchin Suina 26:16. Nisienlakhawm a hung hrât chun, a lungril a hung uong a, khawhlôtakin a thaw ta a, a Pathien LALPA chunga chun a bawsiet ta a; riminhnik rawna maicham chunga riminhnik raw dingin LALPA biek ina chun a fe ve ta a.

Pathienin a theidá takhai laia mi chu chapona hi a nih. Bible pûmpuia hin Pathienin chapona a theida thu ei hmuh a. Lungrila chapo le a taka inlangtirhai phawt chu Pathienin a hmu pei naw a nih. Chapona hi sûol len tak, mi sukse thei le thina chen intlungtir theitu a nih.

A tlângpuiin chapona hi ngirhmun inhnuoi lai ni lovin ngirhmun insang lai a um nuom. Mi tin hin chapona chi khat nei vawng inla khawm, ei ngirhmun inhnuoi lai nekin mi nêka ngirhmun hima ei um hin ei chapo awl a; fimkhur hle ding a nih.

Mihriem, mani inhmu hi thil intâk tâk a nih. “Ka chapo de aw!” ti lem hi chu ei thei naw ang tluk a nih. Chuleichun, mani inenfelna hun, din taka ei ṭawngbau, khawsak dàn, chang dànhai suikîrna hun hi nêi rawp ding a nih.

Mani hi inbîek rawp hi a ṭha. Mani inbie ngai lo, inenfel ngai lo rêng rèng chu chaponain a mân nghal hlak a, tluksîet hun a nei tei hlak. Tluksîet hmaa mani inhrîetsuok vat hi thil pawimaw a nih.

Hi lei hi a ni el thei Isu khawmin mi hausahai ta ding chun vanram lut an tak ding zie a hril hiel nasan. Thaw thêia inngaina dam, mamaw tâwk neia inngaina dam hi ringtuhai ta dingin thil ṭium tak a nih. Thlarau nun suksetú el chau ni lovin, taksa thina chen khawm intlungtir thei a nih.

Hi taka khawm hin Uzzia hi kum sawmparuka upa chau a niin Juda ram lal a ni a. “LALPA a zawng sûng po chu, Pathien chun ân hlawtlingtir bawk a,” ti a nih. Israel-hai hmelma hlun Philistin mihai chu a hnebàn a, hmun tinah vengna in a bawl a, thlalêra hai chen khawm in ropui a bawl a nih. Lalpa a zawng leiin kil tina inthawkin ralmûongin a um a, an ṭhang dùok dûok a, a hausa thùr thûr el a nih.

Amiruokchu, ngirhmun pawimâw taka a hung ngir chun, a lungril a hung uong a, chaponain a faksiet a; Temple-ah thiempuhai chauvin an thaw hlak maicham chunga chun riminhnik raw dingin a lût el ta a. Thiempu Azaria le thiempu dang sawmrîethaiin an sawiselna khawm chu ieng-ma-lova ngaiin riminhnik rawna mêi lakna a kuta a chawi zing lai chun a bâwkah inpharna hri a hûng suok a, inpharna hri chun a man a, a thi ni chenin an phar a, lal ropûi tak kha in hrana khum a ni tah.

Lal ropûi tak ni si, maichama riminhnik rawtu ding chu thiempuhai an nih ti chu mi dang nek khawma hre ding a na. Chapona hin thil ṭha le indik tîeng mit a sukdel hlak ti a sukfie. Thil indik naw khawm hre thei lo khawpa chapo thei a nih.

Hi hi vawisûna ringtuhai ta dinga inchuk ding pawimâw tak a nih. Ṭhaa inngaina hi chapona a na, indik lema inngai tlatna hi chapona a na, chapó lova ei inngaina khawm hi ei chapona chu a nih. Ei Pathien hi chapôhâi keihnûoi hlaktu Pathien a nih.

Ei chapo zie min hriettir theitu chu Thlarau Thienghlim a nih. Thlarau inhriettir ni lova thaw thei ei ni lei ela ei fe chun Pathienin a mi pawttla dùoi dûoi el ding a nih. Ringtú, i kalchawi le nun enfel rawp hlak rawh. A bikin mi nêka ngirhmun insâng, hlaw hau, thîem lemhai lem chu inenfie zing a pawimaw, mani ei inhriet hmaa chapo hi thil awlsam tak a nih. Mani inefel hlak ei ta, ringnaah ei um am ti mani le mani ei infîe rawp hlak ding a nih.

Rev. Joe Sanghmingthang
Bethesda Center, New Delhi
6th May, 2019

Our Address

ICI Secretariat,
Sielmat, PO Box - 3,
Churachandpur - 795128
Manipur, India

Email: hq{at}ici.net.in
Website: https://www.ici.net.in

Our Location

© 2019 Independent Church of India | https://www.ici.net.in. Our site is a secure site using SSL and encrypted content.