Pathien ichawimawi ni i nuom am?

By Rev. Joe Sanghmingthang Khawbung

Jakob 4:6, 10. Nisienlakhawm, lunginsietna tam nawk zuol a pêk hlak; chuleiin, Pathien lekha thuin, “Pathienin mi chapôhai a kal a, inngaitlawmhai ruok chu lunginsietna a pek hlak,” a ti a nih. Lalpa mithuin inngaitlawm ro, chuongchun, chawimawi a ti cheu.

Mihriem hin ei pieng dàn phung panngaiah hrîetna le varna nei nûom vawng ei nih ti inla an khel ring a um nawh. Amiruokchu, mi var tak ni si a Pathien ṭina nei lo chu ieng am ṭangkaina a um chuong a? Mi var chapó tak el mani thlarau khawm ngaisaklo nêkin mi mâwl, a mawl ang anga Pathien rawngbawltu ngaisang a umin a hlu lem.

Pathien ṭhang lova mi var chu miin an inpak phàt phàt leh a phûr hlut a, an inpak naw phat leh nuorna ding a zawng el hlak. Mani nina inhrea Pathien ṭitu ruok chu miin an inpak khawmin a lâwm hlut chuong nawh a, an inpak naw khawmin a nûor chuong nawh.

Chik hman ro tulai khawvel a hin, lekha thîem tàk tâk khawm kohran lai ei um ta a, a thîem thìem ṭhuoitu ding khawmin ei thlâng pei ta a, a varzângna khawm tam tak a um. Var fûta ei ngaihai khawm an thil thaw ṭhat inpâk lova naupangte ang ela nuor bûot chieng ei um, an sumthei deuhaiin ei suklang nawa ti thu chau a nih. Hieng mihai hi mi chapó, Pathien ṭina nei lo, mani nina suong anni hlak.

Khawvêla thil pô pò hre vawng inla khawm inngaitlawna ei nei si naw chun Pathien iengkim chunga rorêltu hmaah ei ngir pha ieng am hlawkna um chuong a ta? Var tum taluo, hriet râwn tum taluo, hausak tum taluo lo ding a nih. Thil a taluo hrîm hrìm a ṭha nawh. Pathien hrietna kawnga inṭhanglienna ding dâl khawpa varna ngainat hi umzie bo a na, nun a siemṭha nawh a, chapona hûongah a mi ṭhuoilut hlak.

Inngaitlâwmhai chu Pathienin lunginsietna a pek hlak a, Pathien lawm zâwng tak a nih. Pathien lâwm zawnga um nêka khawvêlah hin hlu lem thil ieng am a um chuong a? Pathienin a mihai chu inngaitlâwm dingin a dit. Kristien inti taphawt chu an inngaitlawm ding a nih. Asan chu an zui Isu Krista kha inngaitlâwm tak a ni leiin.

I hriet rawn deu deuva, i var deu deuva, nangah Pathien ṭina a um si naw chun rorêlna i hmasawn insâng ting ding a nih. Hriet rawn le varna hi sûol a ni nawh, amiruokchu, inngaitlawmna ṭhang lo chun sûol len tak an chang thei.

Thil tâm tàk hre taah in ngai a, hrietthiemna khawm hau hle taa inngai khawm a ni thei. Ana chu i hriet nêkin i hriet naw a la tam lem ti i hriet zing ding a nih. I hmaa mihai lai khawm hrethîem an lo um nalawm; ana chu hriet naw tam tak an lo nei tho a nih. Hre taah in ngai khawma nang a nêka hre lem sâng tel an um a, varah in ngai khawmin i neka var lem sang-za-tam khawvêla hin an um ti hriet zing ding.

Kristien nina indik tak chu mani neka mi dang ṭha lema ngaina hi a nih. Mi dangin sûol lien tak an thaw khawma demin sawisêl el ngai naw la; ama nêka ṭha lemah inngai naw rawh. Ieng chen am i ṭha thei ding i hriet a?

Pathienin a chawimawi nuomhai chu mi inngaitlawmhai hi an nih. Mi inngaitlawmhaiin Pathien hmêl an hmu hlak a, Pathien malsawmna an dawng hlak. Mi nunah an buoi ngai nawh a, suksûol thêi zing anni ti an inhrieta, fimkhûr takin hringnun an hmang hlak. Pathien ichawimawi ni i nuom naw a? inngaitlâwm el la...

Rev. Joe Sanghmingthang
Bethesda Center, New Delhi
7th May, 2019

Our Address

ICI Secretariat,
Sielmat, PO Box - 3,
Churachandpur - 795128
Manipur, India

Email: hq{at}ici.net.in
Website: https://www.ici.net.in

Our Location

© 2019 Independent Church of India | https://www.ici.net.in. Our site is retina display ready and secure with SSL and encrypted content.