Sandamna chu, a tawi zawngin, suola inthawka sandama umna chu a nih. Bible hin a changin sandamna hi taksa sansuokna/sandamna a hril hlak a (entirna’n Phil. 1:19); amiruokchu, Bible in a hril tak chu chatuon dai thlarau sandamna hi a nih.
“Ienga inthawka sandamna am ie?” ei ti el thei. Hi sandamna hi Pathienin suol chunga a rorelna, a lungsennaa inthawka sandamna chu a nih (Rom. 5:9; 1 Thess. 5:9).
“An leh, iem kei ka thang vena? Iem sandam ka ngaina?” khawm ei ti el thei. I thang ve a, iengkim hi nang a thangna vawng a nih.
La hril pei ei tih.
Ieng leia Sandam ei ngai am?
Johan 3:7 ah Isu’n Nikodem a kuomah i piengthar ding a nih tiin a hril a. Ieng leia Nikodem kha a piengthar a ngai a ti am a na? Anih, ieng leia nang le kei khawm hi ei piengthar a ngai am a na?
I buoi am? Nikodem khawm kha a buoi ve. Ama lem kha chu mipuihai hotu, dan inchuktirtu meu nisienkhawm a hrietthiem nawh a. “Mi a tar hnungin iengtin am pieng thei a ta? A nu sulah vawi hni lutin a pieng ding am a nih?” a ti ringawt el a. A buoi chauh khawm a ni nawh, Isu thuhril kha a awium naw zie le invet thlak tak a ni zie khawm a ngaituo a nih.
Nikodem in a hrietthiemnawna san lien tak chu hieng thil hi ama ngaidana hrietthiem a tum lei a nih. Kha tak kha a thaw suolna, a hrietthiem thei nawna a ni bawk. Bible chun, “Kraws thu chu bohmang zinghai ta ding chun invetna a ni si a, eini sandam zinghai ta ding ruok chun Pathien thilthawtheina a ni lem” (1 Kor. 1:18) a ti hrim a. Nikodem chu boral a na, a boralnaa inthawka sandam ngai a na. Chu ding chun a pieng thar a ngai a nih. Amiruokchu, a piengtharna ding chu a hrietthiem thei nawh. A buoithlak ngawt el! Piengthar tul bawk, piengthar dan ding hre bawk lo.
Isu Krista khan chatuon thil, thlarau thil a hril a nih ti kha Nikodem khan a hriet der nawh. Hi lei hin, sandamna, piengtharna ei hril pha leh eini khawm hieng ang hin ei ngaituo ve a tul a nih. 2 Korinth 4:18 chun, “Thil hmuthei hi en lovin, thil hmutheinawhai chu kan en lem si a; thil hmutheina hi sawtnawtea ding a na, thil hmutheinawhai ruok chu kumkhuoa ding a ni si a” tiin a lo hril kha hi hi a nih.
Awleh, tuhin, chatuon thil ngaituoin, sandam ei ngaina san kha hang hril nawk ei tih.
Pathienin mihriem a siem khan, Ama le inpawlna thatak nei dinga a siem a na. Hi hi Genesis 3:8 a Pathienin zantieng ni nema mihriem a zu kana inthawk khan hriet thei a nih. Amiruokchu, Adam (mihriem hmasatak) khan Pathien dan siem, “a suol le a tha hrietna thing ra ruok hi chu i fak ding a ni nawh; i fak chun i fak ni ngeiin i thi ngei ding a nih” (Gen. 2:17) a ti kha a awi nawa, theira chu a lo fak el tah a. Hitaka inthawk hin mihriem le Pathien inlaichinna chu a tliek tah a nih. Adam a thuawinawna kha Pathien laka helna a ni leiin Pathien tawngsephurna an tuok tah a. Chutaka inthawk chun Adam le a thlahai po po khawm chu tawngsephur an hung ni ve pei tah a. Nang le kei khawm Adam a thla, mihriem ei ninaah chu tawngsephurna, Pathien laka hel, suol thuneina hnuoia umnaa chun ei um ve tah a nih. Genesis 3:17-19 a mihriem tawngsephurna tiem rawh.
GENESIS 3:17-19
Chun, Adam kuoma chun, “I nuhmei thu i zâwm a, thing pakhat, “A ra i fâk ding a ni nawh,” tiha thu ka pêk che kha a ra i fâk leiin hnuoi hi nanga leiin ṭawngsephurin a um tah a nih; i dam sûngin inrimtaka sinthawin a ra chu fa tâng i tih; hling le buorhai khawm insuopêk a ti che; chun, hnuoia thlai chu fa tâng i ta; hnuoia i kîr nâwk hmakhat chu, i hmaiah thlan luong rak khawpin bu fa tâng i tih; hnuoia inthawka lâk suok i ni sih a, pilvut i nih a, pilvutah i kîr nâwk ding a nih,” a tih a.
Genesis 3:17-19
Chuleiin, eini, Adam a thlahai hin, suol chu ei lo inthlasawng ve pei leiin suol le a tawngsephurna khawm ei chungah a hung um ve pei tah a nih. Rom 3:10 a chun ei rengin suol thuneinaa ei um zie a mi hril a. Rom 3:23 a chun, “Mi po poin thil an lo suksuol vawng ta a, Pathien ropuina an chang zo ta naw a nih” tia a hril hi thudik a nih. Adam a thlahai po po kha misuol ei hung ni ta leiin Thuhriltu 7:20 khawma, “Indiktakin, hnuoi chunga hin mi fel thil tha thaw a, thil suksuol ngailo an um nawh” a lo ti ve tawp a nih. Rom 5:12 ah chieng nawk zuolin a hril: “Mi pakhat leiin suol khawvela hin a lut a, suol leiin thina a lut bawk” a tih. Suol man chu thina a ni sih a (Rom 6:23).
Adam a suolna leiin amaa inthawka hung suok po po, mihriemhai po po hi misuol ei ni pei tah a nih. Misuol chu chatuon thina chang ding an nih. Hitaka thina ei ti hi iengkhawm hre loa bo sawng el ding tina a ni nawh a, hremna nasatak a tuok ding a nih. Chu chu chatuon thina le hremna a ni ding a nih (Dan. 12:2; Matt. 25:46; Thup. 20:15 tiem rawh). Isu Krista sandamna chang nawtuhai chu Isu Krista hnawltu an na. I piengthar naw kha mi vakvai i ni tho lai zingin, chu khel tiengah, Isu hnawltu, Setan a tienga thang i ni zing a nih ti hriet ding a nih.
DANIEL 12:2
Chun, mi tamtak hnuoi pilvuta lo in tahai chu tho an ta, a ṭhen chu chatuona hringna changin, a ṭhen ruok chu chatuona thiemnaw le inzakna changin.
DANIEL 12:2
MATTHAI 25:46
Chun, chuonghai chu kumkhaw hremnaah fêng an ta, mi felhai ruok chu kumkhaw hringnaah fêng an tih,” a ta.
MATTHAI 25:46
THUPUONGSUO 20:15
Tûkhawm Hringna Buah a hming ziek an hmu naw chun mei dilah an pei bawk a.
MATTHAI 25:46
Hieng ang hin la hang belsa met ei tih:
- Mi piengthar lo chu misuol inhmang an nih (Rom 3:23; Thuhriltu 7:20).
- Mi piengthar lo chu mithi a nih (Rom 5:12). Taksa hring sienkhawm chatuon thina an hmab^k a nih.
- Mi piengthar lo chu Pathien le hm>lma an nih (Kol. 1:21; Tita 1:16; Eph. 2:3).
- Mi piengthar lo chu thiemnaw chang an nih (Rom 5:18).
- Mi piengthar lo chu Setan a suok an nih (Rom 6:16).
Adam a inthawkin mihriem po po chu, chu chatuon thina chu ei hung nei tah a. Suol thuhnuoia um ei nina leiin einiah suolna a hung zuol deu deu a, ei mizie khawm a thlakdanglam a, thlarau thina ei chang a, ei sie let der tah a nih. Suol ei thaw leiin misuol ei ni nawh a, misuol ei ni leiin suol ei thaw a nih. Lal David khawm khan hieng hin a lo hril: “Ritlonaa inngirin ka um a, Ka nuin suolin a mi vawn a.”
Hi lei hin a nih, i hringnunah vawikhat khawm thilsuol la thaw naw la khawm, i nu le pa thu awi zie la, Sunday School a dam, Biekina dam inkhawm zie la khawm, misuol i ni tho. A san chu suola pieng i ni tlat leiin. Adam a thla i ni leiin misuol i ni el a nih. Tlanhmangna ding a um nawh.
Hi lei bawk hin sandam ei ngai tah a. Sandam ei ni naw chun chatuona hremhmunah ei fe ngei ngei ding a ni sih a.
An leh, Sandamna chu iem a ni leh?
A bula ei lo hril ta angin, sandamna chu suola inthawka sanhimna, sansuokna, sandamna chu a nih. Hi suolna hi Adam a suolna, eini chena ei la’n thla sawng pei, ei renga ei nei chu a nih.
An leh, chu sandamna chu khawlaia inthawka hung ding? Pathien kuomah ngaidamna ei inhni tawp thei naw maw? Annawleh, Pathien chun a mi ngaidam tawp thei naw maw? Sandam ei nina dingin iem ei thaw thei? Iengtin am? Khawla’m? Ieng leiin am?
Indawn ding a va tam de!
Mihriem chu Adam suolnaa inthawkin eini le eini ei insandam thei nawh.
Pathien chu Pathien a na, a thutiema inthawkin a kir ngai nawh. Suol a theida em em leiin suol chu hrem loin a’n liem tir ngai bawk nawh. Hi lei hin Pathien chun iengkhawm um loin a mi ngaidam ringawt thei nawh a, suol man chu pek a ngai ngei ngei a nih. Chuongang pei chun, eini misuol ei nih a, “Suol man chu thina a ni sih a” (Rom. 6:23) a ti leiin eini annawleh tu amani chu a thi a ngai a nih. Ei taksa thina el hi ni loin, thlarau thina man hi a nih pek a ngai chu.
Mihriemhai suola an tlu zo hlim khan, Pathien chun mihriemhai kuomah an suolhai leia inthawina siem dingin a hril a. Leviticus 17 a chun, mihriemhai aia ran thata, a thisen insuoa Pathien kuoma inthawina siem dingin a hril a. Leviticus 17:11 chun, “Taksa hringna chu thisena chun a um si a; in hringna intlanna siemna dinga maicham chunga bunthlak dingin ka pek cheu a nih; hringna dinga intlanna siemna chu thisen ngei chu a ni si a” tiin a hril.
Exodus 30:10 chun chieng lemin a hril a: “Aron chun a kihai chunga chun kum khata vawi khat intlanna siem a ta; in thlahai chenin intlanna suol ta dinga thilinhlan thisen chun kum khatah vawikhat maicham ta dinga intlanna siempek a tih, Lalpa kuoma inthiengtak a nih” tiin.
Amiruokchu, hi intlanna khawm hi a huntawk nawh. Kum khata vawi khat an thaw zie a ngai a. A kum nawk an thaw nawk pei a ngai. A va harsa de! Chatuon dai inthawina chu a ni naw tawp el. A hrim hrimin, misuol chu mihriem a na, ran thisen chun mihriem sandamna tluontling chu a’n tlun pek thei naw hrim hrim reng a nih. Pathienin temporary deua mihriemhai ta dinga a siem mei mei lem a nih. Hi ran inthawina hi a tangkai der nawh ei tina a ni nawh a, suol ta dinga intlanna a tul zie a mi’n hriettir lem a nih.
Pathien chun a mi hmangai em em a. Mihriemhai suola ei inhmanga, chatuon hremna ei lut el ding chu rem a ti nawh a. Sandamna lampui chu a hung buotsai tah a.
Johan 3:16 a chun, “Pathienin khawvel a hmangai bek bek a, chuongchun, a Naupa khat neisun chu a pek a, ama chu tukhawm a ring taphawt chu an bohmang naw a, chatuona hringna an nei lemna dingin” a hung ti tah a. Rom 6:23 a khawm suol man chu thina a nih ti a hril ruol ruolin, “Pathien thilthlawnpek ruok chu ei Lalpa Krista Isu zarah chatuona hringna a nih” a ti bawk a. Ephesi 2:8 a khawm, “Ringna leia lunginsietnaa sandam in ni si a, chu khawm chu nangnia inthawka suok a ni naw a, Pathien thilpek a nih” a ti bawk.
Anih, Pathien chun thilpek (gift) a mi pek a – a Naupa, Isu Krista. Isu Krista chu Pathien a nih a, mihriem khawm a ni bawk a. Ama chu ei renga ei suolna leiin a hung a, a hung inpek a, thina le hremna ei tuor ding ai chu amain a hung tuor el tah a nih. Hmangaina a va zuk inthuk de aw! Hril seng ruol khawm a ni nawh.
Isu chu mihriem a ni leiin a thi a, Pathien a ni leiin a thina chun chatuona dinga hlutna lien tak a nei bawk. A thina chu ei suolhai ta dinga intlanna indik tak le famkim chu a nih. 1 Johan 2:2 chun, “Ama chu ei suolhai thuphachawina a nih; eini suol chau ni lovin, khawvel po po suol thuphachawina khawm a nih” a ti tawp el.
Thilpek hi lawmum ve tak chu a nih. Ei pawisa hmang loa a thlawna ei dawng hi lawm a um hlak. Amiruokchu, a tam lem chu birthday nisien, thil dang dang lawmnaa khawm nisien, mihriem chun ei mamaw tak hi ei inpek rak ngai nawh. A man tlawm met amani dam a ni lem hlak bawk.
Isu thilpek ei nei ruok hi chu mihriemin ei mamaw tak a nih a. Hi neka thilpek ropui le hlu lem um thei ta naw nih. Isu hi ei thil dit mi pe dinga hung a ni nawh a; ei mamaw tak mi pe dinga hung a ni lem. Isu bawkin hieng hin a hril, “Mihriemin a ruol ta dinga a hringna a pek neka hmangaina nasa lem tukhawmin an nei nawh” (Jn. 15:13) tiin. Isu chun a hringna a mi pek a, chu neka ropui le hlu lem um thei ta naw nih.
Hi thu hi tawite chawl la, la hang ngaituo nawn nawk ta. A’n thuk zie le a ropui zie, a lawmum zie hi la hang ngaituo veng veng ta. Hi hi a nih, ei ta dinga Pathienin a hung thaw chu!
2 Korinth 5:21 chun, “Amaa chun Pathien felna ei hung ni theina dingin suol hrim hrim hre lo chu Pathienin eini leiin suolah a siem a” a ti a. Philippi 2:6-8 a khawm, “Ama chu Pathien nina neia um zinig ni sien khawm, Pathien tluka um zing chu, tum lui tlat dinga a ngai naw a, mihriemhai anga hung insiengin, suok angin an siem a, ama le ama an sukruok ta lem a. Chun, mihriem anga hung umin, an ngaitlawm a, thi khawp raka thu zawmin a lo um ta a, krawsa thina ngei chu” tiin a mi hril nawk a.
Isu kha khawvelah inhawi ti takin a hung pieng naw a. Harsa taka hung piengin, mihriem ninaa ei tuorhai, ei natnahai po po a hung hrietin a hung tuor bawk a. Inhawi taka khawvela hung a ni nawh. Mi sandam dinga hung a nih. Isai 53:2-7 a hin a hril chieng em leiin sei deu met hang tiem ei tih:
A hmaa chun thil to innotak angin ama chu an dawn suok si a, hnuoi tawla zung angin a hung kak suok bawk a nih; pienken thatna le hmel mawina hrim hrim a nei naw a, ama ei hmuin ama ei ditna dingin mawina hrim hrim a nei nawh. Ama chu mihriemhai hmusit le dit nawin a um a; lungngainahai nei mi le natna hre mi a na, mihaiin an hmai an hipsan ang ang chun ama chu hmusitin a um a, eini hlak chun ama chu ei ngaisang si nawh Ama chun ei natnahai phurin, ei lungngainahai khawm a phur ngei a; nisienlakhawm, eini chun lungngaina ivurkhumah, Pathien vuokah, sukrinumah, ei ngai si a. Nisienlakhawm, ama chu ei bawsietnahai leiin inhliemin a um a, ei khawhlonahai leiin vuok thidukin a um a; ei thlamuongna dinga thununna chu a chungah a tla a, a vuokna invuolhaia sukdamin ei um tah. Ei reng hin beram angin ei invak hmang a, mani lampui sengah ei pet a, Lalpa chun ama chunga chun ei renga khawhlona chu an nghat ta a. Ama chu neksawr le sukrinumin a um a, nisienlakhawm, an ngaitlawm a, a bau khawm a ka nawh; beramte that dinga an thuoi ang le beram a hmul vawtu hmaa to zinga a um ang elin, anih, a bau a ka nawh.
A tuornahai hi a na em em a. Chu a tuorna chu nang le kei a ta dinga a tuor a nih.
Isu Krista kha inthawina famkim a na. Demkailo, suolna nei lo, amiruokchu ei suolna leia a chunga hremna hung tlung chu a nih. Ei suolnahai po po chu a phur a, kraws a chun nang le kei a ta dingin a hung thi a. Hi lei hin Rom 6:1-14 a chun, Isu thina, phuma a umna le a thonawknaa ei inzawmna a mi hril a nih.
A hmasatakin, Isu chun ei suolhai a phur a, kraws a chun ama leh hemdein a um a. Chun, a thinaa baptisma ei changin, ama leh phumin ei um ve a. Chun, a thonawknaa chun, ama le la um zingin, hringna tharin ei thonawk ve a. Chu hringna thar chu Isu hringna a nih a, a hring leiin ei hring ve a nih.
A chieng nawk zuol theina dingin Rom 6:5-11 hang en nawk ei tih:
A thina inangpuia ama leh ei inzawm ta si chun, a thonawkna inangpuia khawm inzawm bawk ei tih. Hieng hi ei hriet; ei mihriem hlui chu a kuoma hemdein a um ve tah, suol taksa chu sukboa a um theina dinga, tuta chen chu suol suoka ei um ta nawna dingin. Tukhawm a thi ta chu suola inthawkin a suok ta si a. Chun Krista kuomah ei thi ve ta chun, a kuomah hring ve bawk ei tih, ti ei ring a nih; Krista chu mithi laia inthawka keithoin a um a, a thi nawk ta naw ding a nih, ti ei hriet si a. Thina chun ama chungah thu a nei ta nawh. A thina chu suol tieng kawnga kumkhuoa dingin vawikhat chau a thi a na, a hringna ruok chu Pathien tieng kawnga hring a nih. Chuong ang bawkin, nangni khawm suol tieng kawngah thi taah inngai unla, Pathien tieng kawnga ruok chun Krista Isua chun hringah inngai ro.
A hliemnahai chu ei suolhai lei a na. Ei tuor ai a tuor a. Krawsa a thina chu ei thina a nih. Ei thina chu a tuor a nih. Ei suolhai lei bawkin phumin a um a; thina chun a chungah thu a nei naw leiin a thonawk a. A thina le phuma a umnaah ama leh ei inzawm leiin, a thonawkna le a hringnaa khawm chun ei inzawm ve pei a nih. Kolossa 2:12 chun, “a kuoma phum in lo ni ve ta si a, chu bawka chun mithi laia ama keithotu Pathien sinthaw awi leia a kuoma keitho in ni ve kha” a ti a nih. A hringna chu ei hringna a ni ve tah a. Chuleiin, Pathienin a mi enin, ei suolna nekin Isu felna a hmu ta lem hlau a nih. Rom 3:25 a chun, “Pathienin ama felzie inentirna dingin Krista Isu chu a thisen ringnaa suol thuphachawina dingin a ruot a. Pathien zaidawtheinain inhmaa suolnahai chu hriet naw tehlem a thaw a nih” tiin. Ei suolna chu Pathienin a hriet naw a ni nawh. Anachu Isu in ei tuor ai a tuor ta tlat leiin le ei bat chu a mi thung pek ta tlat leiin sandam ei ni ta lem a nih.
Isu Krista chu ei hringna a hung ni tah a nih.
An nawh, iengtin tak in am sandam ning ka ta?
Isu Krista chu thilpek, thilthlawnpek a nih ti ei lo hril tah a (Rom 6:23; Eph. 2:8).
Thilpek a um chun a dawngtu an um hlak ti hi chu thudik a ni maw?
Chu thilthlawnpek dawngtu ku chu nang i nih!
Pathienin a Naupa a pek che a. A Naupa zara nang khawm chatuon hringna i neia, chatuon thina i pumpel theina dingin. Chuleiin, chu thilthlawnpek chu nangin i lak le i lak nawah a’n nghat tah a nih. Thilthlawnpek a ni ang hrimin, a thlawn a nih. Pathien chun mi tu el khawm an bohmang a nuom nawh a (1 Pet. 3:9); mitinin hi thilthlawnpek Isu Krista hi la senghai sien a nuom bek bek el a nih.
“Ka hriet annawm. Iengtin am ka lak ding? Iengtin am sandam ka ni thei ding leh”
Hi hi i zawna (question) a la ni rawp am?
Ringnain sandam ei nih. A hmasa takin Isu Krista thina, phuma a umna le a thonawkna Chanchin Tha chu ei lo hril tah a (Eph. 1:13). Chu zoa chun, Isu Krista chu ringin, amaa chun i iengkim innghat ding a nih (Rom 1:16). Chuong chun a nih thilthlawnpek ei dawng dan ding chu – ei ringnain.
Hi indawnna bawk hi Philippi intang-in vengtu khawm khan a lo indawn ve a. Paula le Sila kuoma chun, “Puhai, sandama um dingin ieng am ka thaw ding?” a ta. Anni chun, “Lalpa Isu ring la, chuongchun, sandamin um i tih, nang le i sunghai leh” an tih a (Thilthawhai 16:30-31). A va zuk awlsam ta de. A harsa le rinum Isu’n a tuor a, eini chu a lo ring chu ei thaw ding chu a ni el tah a nih.
Hitaka hin Isu Krista, Mi (person) hi ring ding a ti a nih a. “A chanchin hi indik dingin ka ring” ti ang zawng ni loin, Ama, Isu Krista ngei kha ringa, innghat ding a nih. A san chu Ama kha ei damna a ni sih a.
Lalpa Isu Krista chu ei suolhai aiin a thia, thina hnein a thonawk tah ti hi ring el ding a nih. Pathien chun sin po po a lo thaw vawng tah a. A thaw zo sa vawng a nih. Kum tam tak liemtaa a lo zo ta sa a nih. Nang i thaw ding chu ringnaa lo pawm chu a ni el a nih. Rom 10:9-11 chun, “I bauin, ‘Isu chu Lalpa a nih’ tia i tan a, mithi laia inthawkin Pathienin a keitho ti i lungrila i ring phawt chun sandamin um i tih. Mihaiin an lungrilin an ring a, felna an hmu hlak, bauin an tan a, sandamna an hmu bawk hlak a nih. Pathien Lekha Thuin, ‘Tukhawm ama ring taphawt chu muolpho naw ni hai’ a ti a nih” tiin chieng takin a lo hril sih a.
Isu ring la, bohmang naw ti nih. Johan 3:16 a, “tukhawm a ring taphawt chu an bohmang naw a, chatuona hringna an nei lem” a ti ang kha a ni el a nih. I ring chun; i ring TAK TAK chun; Amain a sandam chea, i thi aiin a thi a, phumin a um a, a thonawk tah ti i ring chun; Ama chu i ta dinga intlanna (ran ni loa mihriem-Pathien ngei intlanna) a nih ti i ring chun sandamin um ngei i tih.
A tawi zawngin, ama chu pawm el rawh. Isu chauh chu sandamna lampui UMSUN a nih (Jn. 14:6). A thina chu ei intlanna dingin a huntawk a. “Midang tu kuoma khawm sandamna a um nawh; vankhuphnuoia mihriem isak lai, a mi sandam ding hming dang hrim a um nawh” (Thilthawhai 4:12) a ti tawp a nih.
Ringnain Isu chu i Lal le i Sandamtu dingin i pawm ta am? I pawm a ni chun, Pathien kuomah a thilthlawnpek hlu em em lei chun lawmthu hril rawh.
Chun, hi hrietchiengna hi i lungrilah hung pieng bawk raw seh: “Tuhin chu Krista Isua umhai ta ding chun thiemnaw inchangtirna hrim a um ta nawh. Krista Isua Hringna Thlarau dan chun suola inthawk chun a mi sansuok ta si a” (Rom 8:1-2).
Hi khawm hi hrechieng rawh: “Chun, nangni bawsietnahai le tisaa sertan nawna leiin thi in lo ni a, nangni ngei chu ama leh a sukhring cheu in ni kha. Ei bawsietnahai po po a mi ngaidam a. Batna lekha thupeka ziek, ei chunga um a mi kal hlaktu chu a thaibo ta si a; chu ngei chu krawsa hemdein a lak hmang ta a” (Kol. 2:13-14)
Pathien ropui raw seh. Misuol ei ni lai zingin a hmangaina leiin sandamna a mi buotsai peka. Rom 5:8-10 chun, “Pathien chun a mi hmangaina chu inpak tlakin an lang tir a, mi suolhai ei ni laia Krista eini aia a thina khan. Chuongchun, a thisena thiem inchangtira ei um ta hin chu, ama lei bawkin Pathien lungsennaa inthawkin sandamin um ngei ei tih. Hmelma ei ni lai hmana, a Naupa thina leia Pathien le lo inrem tah ei ni chun, inrema ei um ta hnung lem hin chu a hringna leiin sandamin um ngei ei tih.”
Marka 1:15 chun, “Sim unla Chanchin Tha hi ring ro” a tih a. Hi lei hin, suola um ei ni ta nawa. Suol ei thawhai khawm sim ding a nih ti ei hmu thei bawk.
Thukharna
Hieng ang hin, ei hril ta sa nisienkhawm, hang hril nawn nawk ei tih:
Inhmaa misuol inhmanghai kha Isu Krista chun a mi hung zawng suok a.Ama bawkin, “Bohmanghai zawnga sandam dingin Mihriem Naupa hi a hung a ni hrim a nih” (Lk. 19:10) a ti a ni kha. Misuol inhmang ei ni a, Pathienin a mi hmangai si leiin, ei aia ei suolna tuortu ding a tul tah a. Chu chu Lalpa Isu Krista hi a nih. Misuol dangin misuol ai a aw thei nawh. Jeremia 31:30 chun, “Mi tin chu mani suolna ngei chun thing a ta, mi tin grep thur fatu chu, ama hahai ngei chu tim a tih” a lo tih a. Hi ang bawk hin Ezekiel 18:20 khawmin, “Mi a suksuoltu chu, chu chu thing a ta; naupa chun pa suolna chu phur naw nih a, pa khawma naupa suolna chu phur bawk naw ni; mi felna chu mi fel chunga chun um a ta, mi rilo ritlona chu mi rilo chunga bawk chun um a tih” a lo ti a ni kha. Hi lei hin Isu Krista chu Pathienin a hung tir tah a. Pathien a nia chu mihriemin (ei ai a aw theina dingin) a hung a. Mihriem a ninain ei tuor ai chu a hung tuor a nih. Chuleiin, Isu Krista ringtu taphawt chu an ta dinga tuorna siema uma inthawk chun an zalen tah a nih. Isu chun an tuor ai a lo tuor ta si a, an suolhai chu Isu tuorna leia ngaidam a ni ta sih a.
Inhmaa mithi ei ni kha hringna pekin ei um tah. Ephesi 2:1-6 a chun “Ei bawsietna leia thi ei ni lai meu khawmin, Krista ruolin a mi sukhringveh a, (lunginsietnaa sandam in ni tah)” tiin a mi hril a. Mithihai kha a mi sukhring a nih. Chun, 1 Peter 2:24 a khawm, “Suol tiengahai thi tain felna tienga ei hring theina dingin, ama ngeiin a taksain thinga khan ei suolhai a phur a, ama vuokna invuolhai chun sukdamin in um tah a” a ti nawk a. Johan 5:24 a khawm, “tukhawm ka thu hrea a mi tirtu ring chun chatuona hringna a nei tah, inthiemloin a um nawh a, thinaa inthawkin a suok a, hringnaah a lut lem tah a nih” a ti a. Isu ei ring hin “hringna pek ei ni ding” a ti el nawh a, “nei tah” a ti lem a nih.
Pathien hmelmahai kha Pathien le inremin ei um tah.Pathien chun a Naupa khat neisun a mi pek a. Isu ring taphawt chu Pathien le inremin ei um thei tah a nih. 2 Korinth 5:18-19 a chun, “amaa chun Krista leiin ama le inremin a mi siem a, inremna rawngbawl sin a mi pek a; khanga, Pathienin Kristaa chun khawvel hi ama le inremin a siem a, an bawsietnahai chu bawsietnaa ruot pek loin, inremna thu a min kawltir kha” a ti tawp el a nih. A va zuk tha em em de. Kolossa 1:22 le Ephesi 2:15-16 khawm tiem sa rawh. Pathien chun ama le ei inremna theina ding a hung siem a. Misuol le Pathien chu hung khawm theiin, inremin ei um tah. A va thlamuongum de!
Thiemnaw chang ei nina kha thiemchangin a mi siem.Thiemnaw changhai chu Isu thina khan ei thiemnaw changna kha a thipui dai tah. Rom 3:24 a chun, “Chuong a ringtuhai chu Krista Isua intlanna um lei chun, lunginsietna a thlawna thiem inchangtirin an um a” a tih a. Hi thiemchangna hi a thlawn a nih. Rom 8:1-2 hi a tha bek bek: “Chuongchun, tuhin chu Krista Isua umhai ta ding chun thiemnaw inchangtirna hrim a um ta nawh. Krista Isua Hringna Thlarau dan chun suolna le thina dana inthawk chun a mi sansuok ta sih a.”
Setan suoka umhai khawm insuo zalen ei ni tah. Suok chu inthla a ni ding chun a man pek kim a ngai hlak. Chu chu intlanna a nih. Setan suokhai (Setan sala intanghai) chu eini le eini ei suok thei nawh. Hi lei hin Isu Krista chu ei aiin a hung tah a. “A thisen leiin amaa chun ei intlannaei nei a nih” (Eph. 1:7) a ti a nih. Rom 6:22 khawmin, “Tu ruok hin chu suola inthawka sukfihlima um a, Pathien suokhai in hung ni hin inthiengna hmu khawpin ra in nei in sawnnaw; chu chu tawpna kumkhuoa hringna leh” a ti thuoi el a nih. Galati 5:1 a khawm, “Suok ni lo dingin Krista chun a min suok tir kha; chuongchun, ngir det unla, suok ringkawla chun intang nawk ta naw ro” tiin a mi thlamuon a nih.
Rom 6:6-11 hin suk tawp ei tih:
Hieng hi ei hriet; ei mihriem hlui chu a kuoma hemdein a um ve tah, suol taksa chu sukboa a um theina dinga, tuta chen chu suol suoka ei um ta nawna dingin. Tukhawm a thi ta chu suola inthawkin a suok ta sih a. Chun, Krista kuomah ei thi ve ta chun, a kuomah hring ve bawk ei tih, ti ei ring a nih; Krista chu mithi laia inthawka keithoin a um a, a thi nawk ta naw ding a nih, ti ei hriet sih a. Thina chun ama chungah thu a nei ta nawh. A thina chu suol tieng kawnga kumkhuoa dingin vawikhat chau a thi a na, a hringna ruok chu Pathien tieng kawnga hring a nih. Chuong ang bawkin nangni khawm suol tieng kawngah thi taah inngai unla, Pathien tieng kawnga ruok chun Krista Isua chun hringah inngai ro.
Isu Krista ringtuhai, mi piengtharhai ta ding chun ran thisena inthawi a ngai ta nawh. An aiin Isu Krista a thi ta leiin anni chu an him tah a nih. Isu Krista chu inthawina po po, ei suolna po po aiawtu a ni tah. Ei suol man chu Isu’n a tuor a. A chungah hremna chu a tlung tah. Ama chu aiawtu a nih.
Unau dittak,
Lalpa Isu Krista sandamna changin i piengthar ta am? Piengtharna hi ei damlai nia dinga mihriemin ei ngaipawimaw ding tak chu a nih. A pawimaw le a tul chu a nih. A chunga ei hril poa inthawk hin Isu Krista chu i ring ta am? Sandamna i chang ta am?
Annawleh i la buoi am?
I la buoia, hrilpuitu i mamaw a ni chun, hi hnuoia form hmang hin, indawnna i neihai le i dit dan, i mamawhai chu hung hril rawh. I hming i ziek nuom naw a, i hril nuom naw a ni khawma a pawi der nawh. Khawlai khawm i hming hi suklang ni naw nih, ei Lalpa hmaa ti naw chu.
