Independent Church of India Tuithaphai Presbytery Kristien Ṭhalai Pawl in October 21-23, 2022 hun sûnga Rengkai ICI Gilgal a “Khawvel hi ka ta dinga hemdein a um tah” (Gal 6:14) ti thupuia hmanga Annual Conference a vawi 62-na an hmang chu a lo ṭumṭiek tah. Conference hawngna le inhlânna Rev. Lalneikhum, P/S Tuiṭhaphai Presbytery in a nei a, KTP Anthem “Lal Iengkim Thawthei” sak ani zoin lawmlûtna thucha Pu Lalnunmawi Zote, Vice- Chairman, TPKṬP in hril a, Tuiṭhaphai Presbytery huop sûnga KṬP Unit hran hran ha’n Solo, Group Song le Hla Pâwlpui ah inruolsiekna an nei.
Annual Conference hmang a ni sûng Rev. Lalramlawm Inbuon, EAL ICI le Rev. J. Thanglur, Secretary, Mission ICI hai a’nthawkin Pathien thucha ngaithlak a ni a, Pastor Robert Vanlallien, Pastor Gospel Lalkanthar, Mr. James L. Darngawn, Lecturer, SBC le Mr. Carey L. Inbuon ha’n Pathien thua sharing an nei.
Annual Conference vawi 62-na hmang ani huna hin ICI Central Choir, NPT Central Choir le, TKṬP Solo Competition 2021 a pakhatna latu- Nk. Juanita Zoparmawi hai a’nthawkin inpakna hla ngaithlak a ni a, Tuithaphai Presbytery sûnga KṬP members, Theology le Secular tienga a thaw ṭha bîk zuol hai le, Solfa exam-a hlawtlingna chang hai Chawimawina Thuziek inhlan an nih.
Hi huna hin Mr. Lalsuongum Shakum, Secretary, TPKṬP a’nthawkin secretarial report ngaithlak a ni a, inruolsiekna chi tum tum a result hai puongna le lawmman hai semna nei a nih. Hla Pawlpui inruolsieknaah Rengkai KTP Unit chu a thiem tak niin a pakhatna an lâk a, a pahnina chu Sielmat KṬP Unit, a pathumna latu chu Khawmawi KTP Unit in an nih. Group Song inruolsieknaah a 1st latu chu Sielmat le Rengkai Unit an ni a, 2nd- Khawmawi Unit, 3rd- Hmarveng Unit.
Solo Competition-a a pkhatna latu chu Nk. Rebecca Lallawmkim, Gilgal Unit a ni a, 2nd- Nk. Lalrinpui, Saikawt Sub. Hqtrs., 3rd- Tv. Jimmy Songthangchung, Lamka Unit.
Lawmthu hrilna Upa Ramhlunsang, Chairman, TPKṬP in a nei zoin Pastor Lalnghillo Ṭhiek in Annual Conference kharna le Benediction hrilna neiin Conference hi khar a ni a, Conference hun sung hin thlarau ruoi el chau niloin taksa ruoihai khawm ṭhe niin dit khawp lo takin hmang zo a lo ni tah.
