Tirko le Co-ordinator hai rawngbawlna a hnuoiah ang hin suklang a nih.
Rev. Evan John, YCO
Thalai General conference vawi-39na in YCO in Assam Hills Presbytery unit tin kanna nei sien tia a rel dungzuiin August 3-23, 2023inkar sung khan khaw tin a kan a, August 18-20, 2023 sung khan Muolhoiah Thalai Crusade a nei pui bawk. A rawngbawl sung hin Presbytery thuoituhaiin tha takin an thlawp tluon suok zaka inpak an um takzet. Hi zo hin Hmarkhawlien Thalai Ina Caretaker Quarter ding bawl meka um enkai malamin Central Committee ah a thang.
Rev. Lalrohlu, EAL
August 18-20, 2023 khan Hnachangzawl, Assam Hills Presbytery ah Local Crusade a nei pui a, August 21-24, 2023 khan Huonveng ah Hmunthazau, Buolmuol, Dolaichunga le Huonveng kohranhai ta dingin Joint Churches Crusade a nei pui bawk. August 25-27, 2023 khan Saron ah Local Crusade a nei pui nawk. Pathienin a mihai tawngtaina a dawn a, kohranhaiin malsawmna tamtak an dawng a, sandamna inhrietchieng thar le hnungtawl kir nawk an tam hle. August 28, 2023 khan Muolhoi biekinah rawngbawlna a nei a, August 30, 2023 khan Neithangveng, Cachar Presbytery ah rawngbawlna a nei bawk.
Rev. Lalramlawm Inbuon, EAL:
August 17-20, 2023 khan Senvawn, Hmarbiel South Presbytery ah Siemthar nawkna Camp hlawtling takin a nei pui. Campers 268 (volunteer le counsellor thangin) zet haiin Pathien malsawmna ropuitak an dawng a, sandamna zawng po poin piengthar anni thu an puong. Camp zo hin Senvawn, Lungthulien, Tipaimukh, Rawvakawt le Taithu kohranhai a kan bawk. Upa Varkunglien le Pu. D. Kunga haiin a rawngbawlna a bula inthawk a tawp chen tha takin an thlawp a, lawm a um hle.
Rev. HP. Runremthang, EAL
August, 2023 thla bul khan Manipur buoina leia Frontline ah duty a thang ding po po (volunteers) ko khawmin Hmarveng ICI biekin ah Pathien thuah inpawlpuina a nei.
August 3, 2023 khan Churachandpur pumpui huop bunghei tawngtaina programme Tuibuong ah a thang. Tuibuong ah hnam tum tumin Sit in Protest an neina hmunah tum thum lai Pathien thu hril rawngbawlna a nei. Chun, August 5, 2023 khan Manipur buoina thuah Hmarveng khaw sunga nuhmei po po ko khawmin Pathien thuah inpawlpuina a nei.
August 26-September 4, 2023 sung khan Sakawrdai Hmarveng biekinah Siemthar nawkna Camp a nei a, Rev. Lalhmasawn, Pastor R. Laltanpuia le Pro Pastor Emmanuel Zairemtluong hai counsellor in an thang. Kohranhaiin Pathien Thlarau malsawmna an dawng a, lawm a um hle.
